తెలంగాణపై ఆమరణ దీక్షకు కెసిఆర్ యోచన

హైదరాబాద్: ప్రధాని డాక్టర్ మన్మోహన్ సింగ్ తెలంగాణపై స్పష్టమైన హామీ ఇవ్వకపోవడంతో తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు మరోమారు ఆమరణ నిరాహార దీక్ష చేపట్టే ఆలోచనలో ఉన్నారు. సోమవారం రాత్రి ఈ విషయాన్ని ఆయన సూచనప్రాయంగా వెల్లడించారు. తెలంగాణ రాష్ట్ర ఏర్పాటుకు నిర్దిష్ట కాలపరిమితి విధించి, రోడ్ మ్యాప్ వేయడానికి తమకు ఏ విధమైన హామీ ఇవ్వనందున ఆందోళనను మరింత ఉధృతం చేస్తామని ఆయన చెప్పారు. తెలంగాణపై కాంగ్రెసు అధిష్టానం కాలయాపన దిశగానే అడుగులు వేస్తుండడంతో మరోమారు ఆమరణ నిరాహార దీక్ష చేయడమే మార్గమని కెసిఆర్ ఆలోచన చేస్తున్నారు.

దసరా, దీపావళి పండుగల మధ్య కెసిఆర్ ఆమరణ నిరాహార దీక్షపై నిర్ణయం తీసుకుంటామని తెరాస శాసనసభ్యుడు కెటి రామారావు ఆ మధ్య కాలంలో చెప్పారు. నిజానికి, సెప్టెంబర్ చివరి వారంలోనే కెసిఆర్ ఆమరణ దీక్ష చేయాలని అనుకున్నారు. అయితే, కాంగ్రెసు రాజ్యసభ సభ్యుడు కె. కేశవ రావు, తెలంగాణ జెఎసి నేతలు చెప్పడంతో ఆయన వెనక్కి తగ్గారు. ఇప్పుడు నిరాహార దీక్ష తప్ప మరో మార్గం లేదని ఆయన భావిస్తున్నట్లు చెబుతున్నారు.

English summary

Expressing dissatisfaction over his meeting with the Prime Minister, the TRS chief K Chandrasekhar Rao hinted at the possibility of going on a fast unto death.