చేయి పట్టుకు లాగితే చెప్పుతో దేహశుద్ధి చేసింది

By Srinivas

Published: Tuesday, October 4, 2011, 15:41 [IST]

ఒంగోలు/గుంటూరు: అసభ్య పదజాలంతో వేధించి చేయి పట్టుకొని లాగిన ముగ్గురు యువకులకు ఓ వివాహిత చెప్పుతో దేహశుద్ధి చేసిన సంఘటన ప్రకాశం జిల్లాలో చోటు చేసుకుంది. ఓ జంట ద్విచక్ర వాహనంపై ఒంగోలు నుండి పరిసర గ్రామానికి వెళుతోంది. అయితే ఒంగోలుకు పది కిలోమీటర్ల దూరం వెళ్లాకు మద్యం మత్తులో ఉన్న ముగ్గురు యువకులు భార్యా భర్తలను అసభ్య పదజాలంతో వేధించారు. వారు ఎంతగా కామెంట్లు చేసినా భార్యాభర్తలు పట్టించుకోనట్లుగానే వెళుతున్నారు. దీనిని మరింత అలుసుగా తీసుకున్న సదరు యువకులు భార్య చేయి పట్టుకొని లాగారు.

దీంతో ఆమె కింద పడిపోయింది. దీంతో ఆగ్రహం చెందిన ఆ మహిళ భద్రకాళిగా మారింది. తమను కామెంట్ చేసి తనను కింద పడేసిన ముగ్గురు యువకులను పట్టుకొని చెప్పులతో దేహశుద్ధి చేసింది. రోడ్డు పైన గుమికూడిన ప్రజలు ఆమె ధైర్యాన్ని మెచ్చుకొని పోలీసులకు సమాచారం అందించారు. మరోవైపు గుంటూరు జిల్లాలో దారుణం జరిగింది. తెనాలి మండలంలోని సంగం జాగర్లమూడి గ్రామంలో ఓ యువకుడు తన తండ్రి, పిన్నమ్మను నరికి చంపాడు. వారిని చంపకుండా అడ్డు వచ్చిన తన తల్లి, నాయనమ్మలపై కత్తితో దాడి చేశాడు. దీంతో వారికి తీవ్ర గాయాలయ్యాయి. స్థానికులు వారిని దగ్గరలోని ఆసుపత్రికి తరలించారు.

Published On October 4, 2011