వైయస్సార్ చాపర్ క్రాష్, అధికారులపై చర్యలకు రెడీ

By Pratap

Published: Tuesday, October 4, 2011, 9:40 [IST]

హైదరాబాద్: వైయస్ రాజశేఖర రెడ్డి హెలికాప్టర్ ప్రమాదం విషయంలో అధికారులపై చర్యలు తీసుకునేందుకు రాష్ట్ర ప్రభుత్వం ముందుకు వచ్చింది. వైయస్సార్ హెలికాప్టర్ ప్రమాదంపై వైయస్సార్ కాంగ్రెసు పార్టీ అధ్యక్షుడు వైయస్ జగన్ అనుమానాలు వ్యక్తం చేస్తున్న నేపథ్యంలో సిబిఐ నివేదికకు అనుగుణంగా ఇద్దరు అధికారులపై చర్యలకు ప్రభుత్వం శ్రీకారం చుట్టింది. ప్రమాదం జరిగినప్పుడు పౌర విమానయానాల కార్పొరేషన్ అధిపతిగా ఉన్న ఐఆర్‌టిఎస్ అధికారి బ్రహ్మానంద రెడ్డిపై చర్యలు తీసుకోవాలని ప్రభుత్వ ప్రధాన కార్యదర్శి రైల్వే బోర్డును ఆదేశిస్తూ ఓ లేఖ రాశారు.

ప్రమాదం జరిగినప్పుడు ఎయిర్ ట్రాఫిక్ కంట్రోలర్‌గా ఉన్న (ఎటిసి)గా పనిచేసిన లక్ష్మణ రావుపై చర్యలు తీసుకోవాలని ప్రభుత్వ ప్రధాన కార్యదర్శి పౌరవిమాన యానాల డైరెక్టర్ జనరల్‌కు కూడా లేఖ రాశారు. వైయస్సార్ హెలికాప్టర్ ప్రమాదం జరిగిన తర్వాత బ్రహ్మానంద రెడ్డి తన మాతృ సంస్థ రైల్వే శాఖకు వెళ్లిపోయారు. ఆయన ఇప్పుడు కోల్‌కత్తాలో పనిచేస్తున్నారు. వైయస్సార్ హెలికాప్టర్ ప్రమాదంపై సిబిఐ రెండు నెలల క్రితం నివేదిక సమర్పించింది. వైయస్సార్ పర్యటనకు చేసిన ఏర్పాట్లలో పలు అవకతవకలు జరిగినట్లు సిబిఐ తెలిపింది.

Published On October 4, 2011