కోమటిరెడ్డి రాజీనామా ఆమోదంతో సిఎం హెచ్చరిక

By Pratap

Published: Wednesday, October 5, 2011, 17:32 [IST]

హైదరాబాద్: మంత్రి పదవికి కోమటిరెడ్డి వెంకటరెడ్డి చేసిన రాజీనామాను ముఖ్యమంత్రి కిరణ్ కుమార్ రెడ్డి వ్యూహాత్మకంగానే ఆమోదించారని రాజకీయ వర్గాల్లో చర్చ జరుగుతోంది. మంత్రి పదవికి కోమటిరెడ్డి చేసిన రాజీనామా లేఖను ఆమోదానికి సిఫార్సు చేస్తూ కిరణ్ కుమార్ రెడ్డి బుధవారం గవర్నర్ నరసింహన్‌కు పంపించారు తెలంగాణ మంత్రులకు హెచ్చరిక చేయడానికే ఆయన కోమటిరెడ్డి వెంకట రెడ్డి రాజీనామాను ఆమోదించినట్లు చెబుతున్నారు. తెలంగాణపై కాంగ్రెసు పార్టీ అధిష్టానం నిర్ణయం తీసుకోవడంలో జాప్యం చేస్తున్న నేపథ్యంలో మరింత మంది తెలంగాణ మంత్రులు రాజీనామాలు చేస్తారనే ప్రచారం సాగుతోంది.

తాము రాజీనామా చేస్తే ఆమోదం పొందుతుందేమోననే భయాలను తెలంగాణ మంత్రులకు కలిగించడానికి కోమటిరెడ్డి రాజీనామా ఆమోదాన్ని ప్రయోగించినట్లు చెబుతున్నారు. గతంలో జూపల్లి కృష్ణా రావు చేసిన రాజీనామాను కూడా అదే రీతిలో ఆమోదించి కొంత మేరకు మంత్రుల దూకుడును ఆపగలిగినట్లు భావిస్తున్నారు. కాగా, కోమటిరెడ్డి వెంకటరెడ్డి ముఖ్యమంత్రి కిరణ్ కుమార్ రెడ్డిపై తీవ్ర అసంతృప్తితో ఉన్నారు. దాంతో ఆయన ముఖ్యమంత్రిపై తీవ్ర విమర్శలు కూడా చేస్తున్నారు. మంత్రి వర్గ విస్తరణ జరిగితే కోమటిరెడ్డి వెంకటరెడ్డికి ఉద్వాసన చెప్పవచ్చునని కూడా గతంలో వార్తలు వచ్చాయి. ఇది కూడా రాజీనామా ఆమోదానికి పనిచేసినట్లు చెబుతున్నారు.

Published On October 5, 2011