తెలంగాణపై ప్రధాని మన్మోహన్ మళ్లీ అదే మాట

By Pratap

Published: Wednesday, October 5, 2011, 17:59 [IST]

న్యూఢిల్లీ: తెలంగాణపై ప్రధాని మన్మోహన్ సింగ్ నోట మళ్లీ అదే మాట వెలువడింది. తెలంగాణపై చర్చలు జరగాల్సి ఉందని, నిర్ణయం తీసుకోవడానికి సమయం కావాలని ఆయన అన్నారు. తెలంగాణ సమస్యను త్వరగా పరిష్కరించాలని కోరుతూ సిపిఎం ప్రధాన కార్యదర్శి ప్రకాష్ కారత్ రాసిన లేఖకు ఆయన బుధవారం సమాధానం ఇచ్చారు. తెలంగాణపై ఏకాభిప్రాయం రావాల్సి ఉందని, అందుకు చర్చలు అవసరమని ఆయన అన్నారు. తెలంగాణ అంశం చాలా క్లిష్టమైందీ సున్నితమైందీ అని ఆయన అన్నారు. సత్వర పరిష్కారం కోసం తాము ప్రయత్నిస్తున్నామని ఆయన అన్నారు.

ఇదిలా వుంటే, కాంగ్రెసు అధ్యక్షురాలు సోనియా గాంధీని పార్టీ ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ కలిశారు. తెలంగాణపై ఆయన సోనియాతో మాట్లాడినట్లు తెలుస్తోంది. సకల జనుల సమ్మెను విరమింపజేయడానికి తమ నుంచి ఏదో ఒక ప్రకటన వెలువడాల్సిన అవసరం ఉందని ఆయన సోనియాకు చెప్పినట్లు సమాచారం. కేంద్ర మంత్రి ప్రణబ్ ముఖర్జీ ప్రకటనతో తెలంగాణపై వేడి మరింత పెరిగింది. తెలంగాణ నాయకులను, ప్రజలను రెచ్చగొట్టే విధంగా ప్రణబ్ ముఖర్జీ ప్రకటన ఉందని భావిస్తున్నారు. ఈ నేపథ్యంలో గులాం నబీ ఆజాద్ సోనియాతో భేటీ కావడం ప్రాధాన్యాన్ని సంతరించుకుంది.

Published On October 5, 2011