తిరగబడతాం: తెలంగాణవాదులకు రాయపాటి వార్నింగ్

By Srinivas

Published: Wednesday, October 5, 2011, 12:25 [IST]

తిరుపతి: గుంటూరు పార్లమెంటు సభ్యుడు రాయపాటి సాంబశివ రావు బుదవారం తిరుపతిలో తెలంగాణవాదులను హెచ్చరించారు. సకల జనుల సమ్మె పేరుతో సీమాంధ్ర ప్రజలపై, సీమాంధ్రుల ఆస్తులపై తెలంగాణవాదులు దాడులు చేస్తే తాము ఊరుకునే ప్రసక్తి లేదన్నారు. తాము తిరగబడేందుకు సిద్ధంగా ఉన్నామన్నారు. సమ్మె పేరుతో అరాచకం సృష్టిస్తున్న వారిని అరెస్టు చేయాలని ఆయన ప్రభుత్వాన్ని డిమాండ్ చేశారు. హైదరాబాదు ఏ ఒక్కరి సొత్తూ కాదన్నారు. అక్కడ మాకు స్థానం ఉంటుందన్నారు. దేశంలో ఏ వ్యక్తికైనా ఎక్కడకైనా వెళ్లే హక్కు ఉందన్నారు. ఢిల్లీ, ముంబయి తదితర అన్ని పట్టణాలలో మాదిరిగానే హైదరాబాదులో అందరికీ జీవించే హక్కు ఉందన్నారు. అది తెలంగాణవాదుల సొత్తు కాదన్నారు. మీకెంత హక్కుందో మాకూ అంతే ఉందన్నారు.

కాగా ప్రత్యేక తెలంగాణ రాష్ట్రాన్ని రాయపాటి సాంబశివ రావు మొదటి నుండి వ్యతిరేకిస్తున్నారు. ఆయన తెలంగాణపై ఎప్పుడు స్పందించినా తెలంగాణకు ససేమీరా అంటున్నారు. కేంద్ర ప్రభుత్వం కూడా తెలంగాణ ఇస్తానని ఎప్పుడూ ప్రకటించలేదంటారు. మరోవైపు తెలంగాణవాదులు రాయపాటి, కావూరి సాంబశివ రావు, లగడపాటి రాజగోపాల్ వంటి పలువురు ప్రజాప్రతినిధులు మాత్రమే తెలంగాణకు అడ్డుపడుతున్నారని సీమాంధ్ర ప్రజలు ఎవరూ తెలంగాణకు వ్యతిరేకంగా లేరని ఆరోపిస్తున్న విషయం తెలిసిందే.

Published On October 5, 2011