కెసిఆర్‌పై ధ్వజమెత్తిన టి - టిడిపి ఎమ్మెల్యే మోత్కుపల్లి

By Pratap

Published: Thursday, October 6, 2011, 16:43 [IST]

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుపై తెలుగుదేశం తెలంగాణ ప్రాంత శాసనసభ్యుడు మోత్కుపల్లి నర్సింహులు ధ్వజమెత్తారు. కెసిఆర్‌ను పక్కకు తప్పించి ఉద్యమిస్తే తప్ప తెలంగాణ రాదని, ఈ విషయాన్ని తెలంగాణ ప్రజలు గ్రహించాలని ఆయన గురువారం మీడియా ప్రతినిధుల సమావేశంలో అన్నారు. ప్రజలు సకల్ జనుల సమ్మెలో పాల్గొంటే కెసిఆర్ ఢిల్లీలో షాపింగ్ చేస్తారా అని ఆయన అడిగారు.

కెసిఆర్ కాంగ్రెసు పార్టీతో కుమ్మక్కయ్యారని ఆయన విమర్శించారు. తెలంగాణ ఇవ్వబోమని చెబుతున్న కాంగ్రెసు నాయకులతో కెసిఆర్ చర్చలు జరపడానికి ఢిల్లీ వెళ్లడమేమిటని ఆయన అడిగారు. కెసిఆర్ తెలంగాణ పేరుతో ఆటలాడుతున్నారని ఆయన వ్యాఖ్యానించారు. మంత్రి పదవి రాలేదనే కెసిఆర్ తెలుగుదేశం పార్టీ నుంచి వెళ్లిపోయి పార్టీని పెట్టారని, మంత్రి పదవి ఇచ్చి ఉంటే పార్టీ పెట్టి ఉండేవారు కారని ఆయన అన్నారు. తెలంగాణ ఆత్మగౌరవాన్ని కెసిఆర్ ఢిల్లీలో తాకట్టు పెట్టారని ఆయన విమర్శించారు.

Published On October 6, 2011