కాంగ్రెసుకు తెలంగాణపై టి-టిడిపి నేత ఎర్రబెల్లి హెచ్చరిక

By Pratap

Published: Saturday, October 8, 2011, 14:28 [IST]

హైదరాబాద్: తెలంగాణ ఇవ్వకపోతే తీవ్ర పరిణామాలుంటాయని తెలుగుదేశం తెలంగాణ పోరం కన్వీనర్ ఎర్రబెల్లి దయాకర్ రావు కేంద్ర ప్రభుత్వాన్ని హెచ్చరించారు. తెలంగాణపై రాష్ట్ర పార్టీ నాయకులతో కాంగ్రెసు మినీ కోర్ కమిటీ విస్తృత స్థాయి చర్చలు జరుపుతున్న నేపథ్యంలో ఫోరం సమావేశమైన తాజా పరిణామాలపై చర్చించింది. తెలంగాణపై కాంగ్రెసు డ్రామాలు కట్టిపెట్టాలని సమావేశానంతరం ఆయన మీడియా ప్రతినిధులతో అన్నారు. తెలంగాణ కోసం తమ పార్టీకి చెందిన 32 మంది శాసనసభ్యులం రాజీనామాలు చేశామని, కాంగ్రెసు తెలంగాణ ప్రాంత శాసనసభ్యులు కూడా రాజీనామాలు చేయాలని ఆయన అన్నారు.

తెలంగాణపై నిర్ణయాన్ని వాయిదా వేసి రాష్ట్రాన్ని అగ్నిగుండంగా మార్చవద్దని తెలుగుదేశం తెలంగాణ ప్రాంత నాయకుడు టి. దేవేందర్ గౌడ్ అన్నారు. తెలంగాణ రాష్ట్ర ఏర్పాటుకు పార్లమెంటులో బిల్లు ప్రతిపాదించాలని ఆయన అన్నారు. ఫార్ములాలతో, కమిటీలతో కాంగ్రెసు అధిష్టానం తెలంగాణపై ముందుకు వస్తే సహించేది లేదని, తెలంగాణ రాష్ట్ర ఏర్పాటుకు ప్రత్యామ్నాయం లేదని ఆయన అన్నారు. కాంగ్రెసు అధిష్టానం సీమాంధ్ర నాయకులను కూడా చర్చలకు పిలవడాన్ని గుర్తు చేస్తూ విద్వేషాలు లేకుండా విడిపోవడానికి సీమాధ్ర నాయకులు సహకరించాలని ఆయన కోరారు.

తెలంగాణ కాంగ్రెసు అంతర్గత వ్యవహారం కాదని ఆయన అన్నారు. ఢిల్లీ పరిణామాల నేపథ్యంలో తెలంగాణ కోసం ప్రజలు ఎదురు చూస్తున్నారని ఆయన అన్నారు. తెలంగాణ
రాష్ట్ర ఏర్పాటు ప్రక్రియను ప్రారంభించాలని ఆయన కేంద్ర ప్రభుత్వాన్ని డిమాండ్ చేశారు.

Published On October 8, 2011