సిఎం కిరణ్ కుమార్ రెడ్డిపై మరోసారి మండిపడ్డ కెకె

By Srinivas

Published: Monday, October 10, 2011, 17:41 [IST]

హైదరాబాద్: ముఖ్యమంత్రి కిరణ్ కుమార్ రెడ్డిపై తెలంగాణ కాంగ్రెసు సీనియర్ రాజ్యసభ సభ్యుడు కె కేశవరావు సోమవారం మరోసారి మండిపడ్డారు. ఉద్యోగులను సిఎం శత్రువులుగా చూడటం సరికాదన్నారు. వారు కూడా ప్రభుత్వంలో భాగస్వాములే అని గుర్తుంచుకోవాలన్నారు. రెచ్చగొట్టే వ్యాఖ్యల ద్వారా ఆందోళనకారులను ఛాలెంజ్ చేయడం ప్రభుత్వానికి సరికాదన్నారు. దురహంకారంతో నడిచేది పాలన కాదని ప్రజాస్వామ్య బద్దంగా ప్రభుత్వం నడవాలన్నారు. తెలంగాణ సమస్యను కేంద్రం త్వరలో పరిష్కరించే ప్రయత్నాలు చేస్తోందన్నారు. తెలంగాణ ఉద్యమాన్ని అణగదొక్కాలని ప్రభుత్వం చూడటం సరికాదన్నారు. సకల జనుల సమ్మెలో పాల్గొంటున్న ఆర్టీసి ఎన్ఎంయు నేతల మధ్య విభేదాలు సృష్టించడాన్ని ఆయన ఖండించారు.

ఉద్యోగులకు జీతాలు, పండుగ అడ్వాన్సులు చెల్లించే దిశలో ముఖ్యమంత్రి చొరవ చూపాలని కోరారు. తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరాం అరెస్టు సరికాదన్నారు. తెలంగాణ కోసం జరుగుతున్న ఆర్టీసి సమ్మెను ఆంధ్రా ఉద్యోగులు ఎలా వాయిదా వేస్తారని ప్రశ్నించారు. కార్మికుల్లో ప్రాంతీయ విభేదాలు సృష్టించడం సరికాదని ఇలాంటి ఘటనలు భవిష్యత్తులో ఇరు ప్రాంత వాసులు కలిసుండే పరిస్థితి కల్పించదన్నారు.

Published On October 10, 2011