సమర్థ నాయకుడివి అనిపించుకో: ప్రధానికి చంద్రబాబు

By Srinivas

Published: Tuesday, October 11, 2011, 12:50 [IST]

న్యూఢిల్లీ: అవినీతిని అంతమొందించి సమర్థ నాయకుడనిపించుకోమని ప్రధాని మన్మోహన్ సింగ్‌కు తెలుగుదేశం పార్టీ అధ్యక్షుడు, మాజీ ముఖ్యమంత్రి నారా చంద్రబాబు నాయుడు మంగళవారం సూచించారు. హర్యానాలో ఓంప్రకాశ్ చౌతాలా పార్టీ తరఫున ఎన్నికల ప్రచారం చేయడానికి చంద్రబాబు వెళ్లారు. ఈ సందర్భంగా ఆయన మీడియాతో మాట్లాడారు. ప్రధానమంత్రి మన్మోహన్ సింగ్ అవినీతిపై పోరాటం చేసి సమర్థవంతమైన నాయకుడు అనిపించుకోవాలని సూచించారు. అవినీతిపై తమతో కలిసి వచ్చే జాతీయ పార్టీల బలోపేతానికి కృషి చేస్తామని చెప్పారు.

అవినీతిపై నిత్యం పోరాటం చేస్తున్న ప్రముఖ సంఘ సంస్కర్త అన్నాహజారేపై విమర్శలు చేయడం సరికాదన్నారు. ఓంప్రకాశ్ చౌతాలా తమకు ఎప్పటి నుండో మిత్రుడని అందుకే ఎన్నికల ప్రచారానికి వెళుతున్నట్లు చెప్పారు. అవినీతి ప్రక్షాళనకు కేంద్ర ప్రభుత్వం చొరవ చూపాలని విజ్ఞప్తి చేశారు. కాంగ్రెసు అవినీతిపై పోరాటం చేయడానికే తాను ఎన్నికల ప్రచారానికి వచ్చానని చెప్పారు.

Published On October 11, 2011