సిఎం నిప్పుతో చెలగాటం: నాగం జనార్ధన్ రెడ్డి

By Srinivas

Published: Tuesday, October 11, 2011, 18:24 [IST]

హైదరాబాద్: ముఖ్యమంత్రి కిరణ్ కుమార్ తెలంగాణ నిప్పుతో చెలగాటం ఆడుతున్నారని తెలంగాణ నగారా సమితి చైర్మన్, నాగర్ కర్నూల్ శాసనసభ్యుడు నాగం జనార్ధన్ రెడ్డి మంగళవారం అన్నారు. పోలీసులు కూడా తెలంగాణ బిడ్డలే అని వారు సకల జనుల సమ్మెకు సహకరించాలని విజ్ఞప్తి చేశారు. ముఖ్యమంత్రి అడుగులకు మడుగులు ఒత్తడం మానుకోవాలన్నారు. చర్చల పేరుతో ఉద్యోగులను విడదీసేందుకు ప్రభుత్వం కుట్ర చేస్తోందన్నారు. దానిని అందరూ తిప్పికొట్టాలన్నారు. సమ్మె శాంతియుతంగా కొనసాగుతోందని ముఖ్యమంత్రి మాత్రం తప్పుదోవ పట్టించేందుకు కుటిల యత్నం చేస్తున్నారని ఆరోపించారు. తెలంగాణ మా జన్మ హక్కన్నారు.

తెలంగాణ కోసం ఉద్యమిస్తున్న వారిని అరెస్టు చేయడం సరికాదని మరో శాసనసభ్యుడు హరీశ్వర్ రెడ్డి అన్నారు. బేషరతుగా అరెస్టు చేసిన వారిని విడుదల చేయాలన్నారు. పోలీసులతో ఉద్యమాన్ని అణిచి వేయాలని చూస్తే మరింత ఎగుస్తుందన్నారు. పోలీసు శాఖలో కీలక పోస్టుల్లో సీమాంధ్ర నేతలు ఉన్నంత కాలం తెలంగాణ పోలీసులకు న్యాయం జరగదన్నారు.

Published On October 11, 2011