బాన్సువాడ ఉప ఎన్నికలు: జెఏసి రైలు రోకో వాయిదా

By Srinivas

Published: Tuesday, October 11, 2011, 11:08 [IST]

హైదరాబాద్: సకల జనుల సమ్మెలో భాగంగా తెలంగాణ రాజకీయ ఐక్య కార్యాచరణ సమితి ఆధ్వర్యంలో నిర్వహించబోయే రైలు రోకో వాయిదా పడే అవకాశాలు కనిపిస్తున్నాయి. తెలంగాణ ప్రాంతంలో ఈ నెల 12, 13, 14 తేదీల్లో రైలు రోకో చేపట్టాలని మొదట నిర్ణయించుకున్న విషయం తెలిసిందే. అయితే దీనిని ఇదే నెల 15, 16, 17వ తేదీల్లోకి మార్చనున్నట్లు తెలుస్తోంది. రైలు రోకో వాయిదాకు ప్రధాన కారణం బాన్సువాడ ఉప ఎన్నికలు అని తెలుస్తోంది. ఈ నెల 13వ తారీఖున బాన్సువాడ ఉప ఎన్నికలు ఉన్న విషయం తెలిసిందే. ఉప ఎన్నికల రోజునే రైలు రోకోను రద్దు చేయాలని నిర్ణయించుకున్నట్లు తెలుస్తోంది.

ఇదే విషయంపై చర్చించేందుకు ఎమ్మెల్యే క్వార్టర్సులో చైర్మన్ కోదండరామ్ ఆధ్వర్యంలో తెలంగాణ రాజకీయ ఐక్య కార్యాచరణ సమితి అత్యవసర సమావేశమయింది. రైలు రోకో వాయిదాతో పాటు తెలంగాణ కోసం చేపట్టవలసిన భవిష్యత్తు కార్యక్రమాలపైనా చర్చించనున్నారు. సకల జనుల సమ్మెను ప్రభుత్వం కుట్ర పూరితంగా వ్యవహరించి అణిచి వేయడానికి చేసే ప్రయత్నాలను ఎలా తిప్పి కొట్టాలనే అంశంపైనా చర్చించనున్నారని సమాచారం.

Published On October 11, 2011