టిడిఎల్పీ ఆఫీసులో మంత్రి శంకర రావు హంగామా

By Srinivas

Published: Tuesday, October 11, 2011, 13:11 [IST]

హైదరాబాద్: చేనేత, జౌళీ శాఖ మంత్రి శంకర రావు మంగళవారం అసెంబ్లీలో హల్ చల్ చేశారు. ఆయన అసెంబ్లీలో ప్రతిపక్ష తెలుగుదేశం పార్టీ కార్యాలయంలోకి వెళ్లారు. తెలంగాణ తెలుగుదేశం పార్టీ సీనియర్ శాసనసభ్యులు మోత్కుపల్లి నర్సింహులు, ఎర్రబెల్లి దయాకర్ రావుతో భేటీ అయ్యారు. ఆయనతో మాటామంతి జరిపారు. ఈ సందర్భంగా శంకర రావు సెక్యూరిటీపై తెలుగుదేశం పార్టీ నేతలు ఆరా తీశారు. దివంగత టిడిపి వ్యవస్థాపకులు తారక రామారావుకు భారత రత్న ఇవ్వాలని మొదట సంతకం చేసిన వ్యక్తిని తానేనని శంకర రావు ఈ సందర్భంగా మోత్కుపల్లి, ఎర్రబెల్లిలతో అన్నారు.

అనంతరం శంకర రావుపై తెలుగుదేశం పార్టీ తెలంగాణ ఫోరం నేతలు ప్రశంసల వర్షం కురిపించారు. కాంగ్రెసు పార్టీలో ఉంటూనే ఆ పార్టీలో ఉన్న అవినీతి నేతలపై ఉద్యమిస్తున్న తీరును వారు అభినందించినట్లుగా తెలుస్తోంది. కాంగ్రెసు అవినీతిని చీల్చు చెండాడుతున్నారంటూ మోత్కుపల్లి ఆయనను పొగిడారట. కాగా మంత్రి శంకర రావు ఏం చేసినా హాట్ టాపిగ్‌గా మారటం సర్వ సాధారణమై పోయింది. తోటి మంత్రులపై, ముఖ్యమంత్రిపై, పార్టీ నేతలపై విమర్శలు చేయడం, పిఎపై చేయి చేసుకోవడం తాజాగా టిడిఎల్పీ కార్యాలయానికి వెళ్లడం ఆయన చర్యలన్నీ సెన్షేషన్ క్రియేట్ చేస్తుంటాయి.

Published On October 11, 2011