తెలంగాణ కోసం మీడియా ద్వారా పోరు: శంకర రావు

By Srinivas

Published: Tuesday, October 11, 2011, 16:45 [IST]

హైదరాబాద్/మహబూబ్ నగర్: తెలంగాణ ప్రజా ప్రతినిధుల సిద్ధాంతం తెలంగాణ సాధనే అని ఆ దిశలో ఎవరికి వారు పోరాటం చేస్తున్నారని చేనేత, జౌళీ శాఖ మంత్రి శంకర రావు మంగళవారం అన్నారు. అసెంబ్లీలో టిడిఎల్పీ కార్యాలయంలో తెలుగుదేశం పార్టీ ఎమ్మెల్యేలతో భేటీ అనంతరం ఆయన మీడియాతో మాట్లాడారు. తెలంగాణ కోసం కొందరు రాళ్లు వేస్తే తాను మీడియాతో మాట్లాడి పోరాటం చేస్తున్నానన్నారు. తెలంగాణపై కేంద్రానికి సిఫార్సు చేస్తానని చెప్పారు. తెలంగాణ కోసం ఎవరు ఉద్యమించినప్పటికీ ఇవ్వాల్సింది మాత్రం కాంగ్రెసు పార్టీయే అన్నారు. రహేజా అక్రమాలు త్వరలో వెలుగులోకి వస్తాయన్నారు. సర్కారుకు రావాల్సిన సొమ్మూ వస్తుందన్నారు.

తెలంగాణ ఉద్యమ నేతలను అరెస్టు చేయడం దుర్మార్గమని మాజీ మంత్రి జూపల్లి కృష్ణారావు మహబూబ్ నగర్‌లో అన్నారు. అరెస్టు చేసిన నేతలను వెంటనే బేషరతుగా విడుదల చేయాలని డిమాండ్ చేశారు. లేదంటే ప్రత్యేక కార్యాచరణ ప్రకటిస్తామని చెప్పారు. ఉద్యమకారుల అరెస్టుకు తెలంగాణ మంత్రులు బాధ్యత వహించాలన్నారు. ఆంధ్రా ప్రాంత కార్మికులు తీసుకున్న సమ్మె విరమణ నిర్ణయాన్ని తెలంగాణ ఆర్టీసి కార్మికులు ఎందుకు ఒప్పుకుంటారన్నారు.

Published On October 11, 2011