బిజెపి చీఫ్ కిషన్ రెడ్డి అరెస్టు, తోపులాటలో గాయాలు

By Srinivas

Published: Wednesday, October 12, 2011, 16:06 [IST]

హైదరాబాద్: భారతీయ జనతా పార్టీ రాష్ట్ర అధ్యక్షుడు, అంబర్‌పేట శాసనసభ్యుడు కిషన్ రెడ్డిని బుధవారం నగర పోలీసులు అరెస్టు చేశారు. ఆయనను నాంపల్లి పోలీసు స్టేషన్ తరలించారు. సకల జనుల సమ్మెలో భాగంగా మింట్ కంపౌండ్ వద్ద ఆందోళన చేస్తున్న తెలంగాణ విద్యుత్ ఉద్యోగులకు సంఘీభావం తెలపడానికి వెళ్లారు. అయితే ఆయన వేదిక వద్దకు చేరుకోక ముందే పోలీసులు అడ్డుకొని అరెస్టు చేసేందుకు ప్రయత్నించారు. పోలీసులు, తెలంగాణవాదుల మధ్య వాగ్వాదం చోటు చేసుకుంది. ఇరువర్గాల మధ్య తోపులాట జరగటంతో కిషన్ రెడ్డికి స్వల్ప గాయాలయ్యాయి. అరెస్టు సమయంలో తనను ఎందుకు అరెస్టు చేస్తున్నారో చెప్పాలంటూ పోలీసులను తీవ్రంగా ఆయన ప్రశ్నిస్తుండగానే అరెస్టు చేసి నాంపల్లి పిఎస్‌కు తరలించారు. తన అరెస్టుకు కారణం చెప్పాలంటూ కిషన్ రెడ్డి పిఎస్ ముందు బైఠాయించారు.

కిషన్ రెడ్డి అరెస్టును మింట్ కాంపౌండ్ వద్ద ధర్నా చేస్తున్న తెలంగాణ విద్యుత్ ఉద్యోగులు తీవ్రంగా ఖండించారు. తమ సమ్మెకు మద్దతు పలకడానికి చాలామంది రాజకీయ నేతలు వచ్చారని అయితే వారినెవరినీ అరెస్టు చేయకుండా కేవలం కిషన్ రెడ్డిని మాత్రమే అరెస్టు చేయడం వెనుక ఉద్దేశ్యమేమిటని ప్రశ్నించారు. కిషన్ రెడ్డిని వెంటనే విడుదల చేయాలని డిమాండ్ చేశారు.

Published On October 12, 2011