తెలంగాణతో ఆటలొద్దు: సిఎంకు జీవన్ రెడ్డి హెచ్చరిక

By Srinivas

Published: Wednesday, October 12, 2011, 17:40 [IST]

హైదరాబాద్: ముఖ్యమంత్రి కిరణ్ కుమార్ రెడ్డి, తెలంగాణ ప్రాంత మంత్రులపై కాంగ్రెసు పార్టీ సీనియర్ నేత, మాజీ మంత్రి జీవన్ రెడ్డి తీవ్రస్థాయిలో విరుచుకు పడ్డారు. ముఖ్యమంత్రి తెలంగాణ విద్యార్థులతో ఆటలాడవద్దని హెచ్చరించారు. రాష్ట్ర ప్రభుత్వం వ్యవహార శైలి తెలంగాణ ప్రజల మనోభావాలు దెబ్బతీసేలా ఉందని విమర్శించారు. తెలంగాణ ప్రాంత మంత్రులు తమ బాధ్యతను విస్మరించి ప్రజలతో ఆడుకుంటున్నారన్నారు. ఇది సరైనది కాదన్నారు. ఏఐసిసి అధ్యక్షురాలు సోనియా గాంధీ 2009 డిసెంబర్ 9 ప్రకటనకు కట్టుబడి తెలంగాణను ఇవ్వాలని తద్వారా ఆమె తన విశ్వసనీయతను నిరూపించుకోవాలని కోరారు. తెలంగాణ ప్రాంత కాంగ్రెసు నేతలు అధిష్టానం ఎప్పుడూ ధిక్కరించలేదన్నారు. సీమాంధ్ర నేతలో ప్రకటన వచ్చాక తెలంగాణ రాష్ట్రానికి అడ్డుపడి అధిష్టానం మాటలను ధిక్కరించారన్నారు.

మరోవైపు కాంగ్రెసు పార్టీ అతి మంచితనాన్ని తెలంగాణ కాంగ్రెసు పార్లమెంటు సభ్యులు చేతకానితంగా భావిస్తే అది సరికాదని అనంతపురం జిల్లా సీనియర్ కాంగ్రెసు శాసనసభ్యుడు, మాజీ మంత్రి జెసి దివాకర్ రెడ్డి న్యూఢిల్లీలో అన్నారు. రైలు రోకోలో పాల్గొనే ఎంపీలపై అధిష్టానం చర్యలు తీసుకోవాలన్నారు.

Published On October 12, 2011