నెలాఖరులోగా తెలంగాణకు శాశ్వత పరిష్కారం: లగడపాటి

By Srinivas

Published: Wednesday, October 12, 2011, 9:48 [IST]

విజయవాడ: తెలంగాణ అంశం విషయంలో కేంద్ర ప్రభుత్వం త్వరలో ఓ నిర్ణయం తీసుకుంటుందని విజయవాడ పార్లమెంటు సభ్యుడు లగడపాటి రాజగోపాల్ మంగళవారం అన్నారు. కృష్ణా జిల్లా మైలవరం ఏఎంసి చైర్మన్ పులిపాక థామస్ ప్రమాణ స్వీకారోత్సవ కార్యక్రమానికి లగడపాటి రాజగోపాల్ ముఖ్య అతిథిగా హాజరయ్యారు. ఈ సందర్భంగా ఆయన మాట్లాడారు. తెలంగాణ అంశం చాలా సున్నితమైన అంశమన్నారు. దీనిపై వెను వెంటనే నిర్ణయం తీసుకోవడం సాధ్యం కాదన్నారు.

అయినప్పటికీ కాంగ్రెసు పార్టీ అధిష్టానం త్వరగా నిర్ణయం తీసుకోవడానికి ప్రయత్నిస్తోందన్నారు. ఈ దీపావళి పండుగలోగా లేదంటే నెలాఖరులోగా తెలంగాణపై శాశ్వత పరిష్కారం వచ్చే అవకాశముందని ఆయన అభిప్రాయ పడ్డారు. ఏఐసిసి అధ్యక్షురాలు సోనియా గాంధీ తెలంగాణ అంశంపై ప్రత్యేకంగా దృష్టి సారించారన్నారు. పండుగ మరుసటి రోజున శాశ్వత పరిష్కారం రావచ్చునన్నారు.

Published On October 12, 2011