రైల్ రోకో యథాథం, కాంగ్రెసును ఆహ్వానిస్తున్నాం: కోదండరామ్

By Pratap

Published: Wednesday, October 12, 2011, 22:19 [IST]

హైదరాబాద్: మూడు రోజుల పాటు తలపెట్టిన రైల్ రోకో యథాతథంగా ఉంటుందని తెలంగాణ రాజకీయ జెఎసి చైర్మన్ కోదండరామ్ అన్నారు. తెలంగాణ రాష్ట్ర సాధన కోసం తలపెట్టిన ఈ రైల్ రోకో కార్యక్రమంలో పాల్గొనాలని కాంగ్రెసు తెలంగాణ ప్రాంత పార్లమెంటు సభ్యుల ప్రకటనను ఆహ్వానిస్తున్నామని ఆయన బుధవారం మీడియా ప్రతినిధులతో అన్నారు. తెలంగాణ ప్రాంతానికి చెందిన మంత్రులు, శాసనసభ్యులు కూడా ఇందులో పాల్గొనాలని ఆయన పిలుపునిచ్చారు. గ్రూప్ - 2 పరీక్షలను వాయిదా వేయాల్సిందేనని ఆయన అన్నారు. రైల్ రోకోపై బిజెపి నాయకులతో తాము మాట్లాడుతామని ఆయన అన్నారు.

అణచివేత ద్వారా తెలంగాణ ఉద్యమాన్ని అడ్డుకోవాలని ముఖ్యమంత్రి కిరణ్ కుమార్ రెడ్డి ప్రయత్నిస్తున్నారని తెలంగాణ రాష్ట్ర సమితి (తెరాస) శాసనసభ్యుడు కెటి రామారావు అన్నారు. రైళ్లను అడ్డుకుంటే తెలంగాణ ప్రజలను జీవితాంతం జైలుకు పంపిస్తారా అని ఆయన ప్రశ్నించారు. ముఖ్యమంత్రి హెచ్చరికలకు భయపడబోమని ఆయన అన్నారు. బర్తరఫ్ చేయాల్సింది ఉద్యోగులను కాదు, ముఖ్యమంత్రిని అని ఆయన అన్నారు.

Published On October 12, 2011