అన్నా హజారే టీమ్ సభ్యుడు ప్రశాంత్ భూషణ్‌పై దాడి

By Pratap

Published: Wednesday, October 12, 2011, 17:32 [IST]

న్యూఢిల్లీ: సామాజిక కార్యకర్త అన్నా హజారే జట్టు సభ్యుడు, సుప్రీంకోర్టు సీనియర్ న్యాయవాది ప్రశాంత్ భూషణ్‌పై బుధవారం దాడి జరిగింది. ఇద్దరు యువకులు ఆయనపై పిడిగుద్దులు కురిపించారు. సుప్రీంకోర్టు ఎదురుగా ఉన్న తన ఛేంబర్‌లో ఉన్న ప్రశాంత్ భూషణ్‌పై ఈ దాడి జరిగింది. కాశ్మీర్‌పై చేసిన వ్యాఖ్యలకు గాను ఆగ్రహించి ఆ యువకులు దాడి చేసినట్లు తెలుస్తోంది. వారిద్దరు భగత్‌సింగ్ క్రాంతిసేన సభ్యులని సమాచారం. దాడి చేసినవారిలో ఒకరిని పోలీసులు అదుపులోకి తీసుకున్నారు. కాశ్మీర్ నుంచి సైన్యాన్ని ఉపసంహరించాలని, భారతదేశంతో కలిసి ఉండడానికి కాశ్మీరీలు ఇష్టపడకపోతే వారికి స్వాతంత్ర్యం ఇవ్వాలని ప్రశాంత్ భూషణ్ ఓ ఇంటర్వ్యూలో అన్నారు. దీనికి తీవ్రంగా రెచ్చిపోయిన యువకులు ఆయనపై దాడికి పూనుకున్నారు.

ప్రశాంత్ భూషణ్‌పై జరిగిన దాడికి సంబంధించి పోలీసులు కేసు నమోదు చేశారు. దాడి చేసిన ఇద్దరిలో ఒక యువకుడు పారిపోయాడు. ప్రశాంత్ భూషణ్‌పై దాడిని అన్నా హజారే టీమ్ సభ్యురాలు కిరణ్ బేడీ ఖండించారు. అవినీతి వ్యతిరేక పోరాటంలో ప్రశాంత్ భూషణ్ కీలక పాత్ర పోషిస్తున్నారు. ప్రశాంత్ భూషణ్‌ను కలుస్తామంటూ వచ్చి ఆ ఇద్దరు యువకులు దాడి చేశారు. గాయపడిన ప్రశాంత్ భూషణ్‌ను ఆస్పత్రికి తరలించారు.

Published On October 12, 2011