తెలంగాణను కాంగ్రెసే పరిష్కరించాలి: తెలంగాణ టిడిపి

By Srinivas

Published: Wednesday, October 12, 2011, 17:03 [IST]

హైదరాబాద్: తెలంగాణ సమస్యను జఠిలం చేసింది కాంగ్రెసు పార్టీయేనని దానిని పరిష్కరించాల్సిన బాధ్యత కూడా ఆ పార్టీ పైనే ఉందని తెలంగాణ తెలుగుదేశం పార్టీ శాసనసభ్యులు రావుల చంద్రశేఖర్ రెడ్డి, జైపాల్ యాదవ్, రాములు బుధవారం అన్నారు. కాంగ్రెసు కోర్ కమిటీ చర్యలు కేవలం జాప్యానికే తప్ప తెలంగాణ సమస్య పరిష్కారానికి కావని విమర్శించారు. వచ్చే శీతాకాలపు సమావేశాలలో తెలంగాణ బిల్లు పెట్టాలని డిమాండ్ చేస్తూ ఈ నెల 18వ తేదిన తెలంగాణ వ్యాప్తంగా నిరసనలు, ఆందోళనలు చేస్తామన్నారు. సకల జనుల సమ్మెలో పాల్గొన్న తెలంగాణ ఉద్యోగులపై పెట్టిన కేసులు ప్రభుత్వం వెంటనే ఉపసంహరించుకోవాలని డిమాండ్ చేశారు.

ఉద్యోగులు ముప్పై రోజులుగా సమ్మె చేస్తున్నా ఏఐసిసి అధ్యక్షురాలు సోనియా గాంధీ, ప్రధాన మంత్రి మన్మోహన్ సింగ్ నోరు ఎందుకు మెదపడం లేదని ప్రశ్నించారు. ఓ వైపు ఉద్యోగులపై కేసులు పెడుతూనే మరోవైపు చర్చలంటే ఎలా అన్నారు. ఉద్యోగులపై కేసులు ఉపసంహరించుకోకుంటే తీవ్ర పరిణామాలు ఉంటాయని హెచ్చరించారు.

Published On October 12, 2011