తెలంగాణపై వైయస్ జగన్‌ది చంద్రబాబు వైఖరే

By Pratap

Published: Wednesday, October 12, 2011, 15:17 [IST]

హైదరాబాద్: తెలంగాణపై వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి తెలుగుదేశం పార్టీ అధ్యక్షుడు నారా చంద్రబాబు నాయుడి బాటనే పడుతున్నారు. చంద్రబాబు రెండు కళ్ల సిద్దాంతాన్ని అనుసరిస్తున్నారనే విమర్శలు వస్తున్నప్పటికీ జగన్ అదే దారి పడుతున్నారు. తాము తెలంగాణకు అనుకూలమూ కాదు, వ్యతిరేకమూ కాదని ఆయన అన్నారు. పార్టీ రంగారెడ్డి జిల్లా పార్టీ నాయకులతో ఆయన బుధవారం సమీక్ష నిర్వహించారు. ఈ సమీక్షా సమావేశంలో ఆయన ఆ విధంగా అన్నారు. తెలంగాణపై ఇతర పార్టీలు అనుసరిస్తున్న పద్ధతినే అనుసరించాలని ఆయన రంగారెడ్డి జిల్లా నాయకులకు సూచించినట్లు తెలుస్తోంది.

తెలంగాణలో 20 శాతం మందిని పార్టీ సభ్యులుగా చేర్పించే బాధ్యత మీదేనని ఆయన వారితో అన్నారు. వైయస్సార్ కాంగ్రెసు తెలంగాణ నాయకులు తమ పార్టీ నేత జగన్ తెలంగాణకు వ్యతిరేకం కాదని చెబుతూ వస్తున్నారు. తెలంగాణవాదుల నుంచి తీవ్ర విమర్శలు వస్తున్నా, తెలంగాణలో అడుగు పెట్టే పరిస్థితి లేకున్నా జగన్ తెలంగాణకు అనుకూలంగా నిర్ణయం తీసుకోవడానికి సిద్ధంగా లేరని తెలుస్తోంది. తెలంగాణ సమస్యను పరిష్కరించాల్సిన బాధ్యత కేంద్ర ప్రభుత్వానిదేనని ఆయన పార్టీ ప్లీనరీ సమావేశంలోనే చెప్పారు.

Published On October 12, 2011