డిజిపి దినేష్ రెడ్డిపై తెలంగాణ నేతల గుర్రు

By Srinivas

Published: Thursday, October 13, 2011, 16:53 [IST]

హైదరాబాద్: రైలు రోకోను అడ్డుకుంటామన్న డిజిపి దినేష్ రెడ్డి వ్యాఖ్యలపై తెలంగాణ ప్రజా ప్రతినిధులు తీవ్రస్థాయిలో విరుచుకు పడ్డారు. డిజిపి, ముఖ్యమంత్రి కిరణ్ కుమార్ రెడ్డి తెలంగాణవాదులను కవ్వింపు చర్యలకు పురికొల్పుతున్నారని తెలంగాణ ప్రాంత కాంగ్రెసు ఎంపీలు పొన్నం ప్రభాకర్, కె కేశవ రావు విమర్శించారు. బాధ్యతాయుతమైన పదవిలో ఉండి ప్రజలను భయాందోళనలకు గురి చేయడం సరికాదన్నారు. తెలంగాణ ఉద్యమం చట్టానికి అతీతంగా ఏమీ జరగటం లేదన్నారు. సమ్మె కాలంలో జరుపుతున్న గ్రూపు-2 పరీక్షలను రద్దు చేయాలని విజ్ఞప్తి చేశారు. అధిష్టానం తెలంగాణ ప్రకటిస్తుందనే నమ్మకం తమకుందన్నారు.

ఎట్టి పరిస్థితుల్లో రైలు రోకో చేసి తీరుతామని దమ్ముంటే దాన్ని అడ్డుకోవాలని సిద్దిపేట టిఆర్ఎస్ శాసనసభ్యుడు హరీష్ రావు సవాల్ విసిరారు. డిజిపి తాటాకు చప్పుళ్లకు తాము బెదిరేది లేదన్నారు. డిజిపికి దమ్ముంటే తమను అరెస్టు చేయాలని ఉస్మానియా విశ్వవిద్యాలయ విద్యార్థులు అన్నారు. అరెస్టులు చేసినా ఉద్యమం ఆగదన్నారు. ఈ సందర్భంగా వాళ్లు ఓయులో డిజిపి దిష్టిబొమ్మ దగ్ధం చేశారు. డిజిపి రెచ్చగొట్టే వ్యాఖ్యలకు అధికార పార్టీ ప్రజాప్రతినిధులు ఎవరూ ఎందుకు స్పందించడం లేదని ఎంపీ విజయశాంతి ప్రశ్నించారు.

Published On October 13, 2011