మీతో పని చేస్తా: కెసిఆర్‌కు మందకృష్ణ బంపర్ ఆఫర్

By Srinivas

Published: Friday, October 14, 2011, 17:41 [IST]

హైదరాబాద్: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుకు మాదిగ రిజర్వేషన్ పోరాట సమితి అధ్యక్షుడు మందకృష్ణ మాదిగ శుక్రవారం బంపర్ ఆఫర్ చేశారు. ఇందిరాపార్కు వద్ద విద్యాసంస్థలను సమ్మె నుండి మినహాయించాలని డిమాండ్ చేస్తూ ఆందోళనకు దిగారు. ఈ సందర్భంగా ఆయన మాట్లాడారు. వచ్చే సాధారణ ఎన్నికల్లో సామాజిక వర్గాల వారిగా సీట్లు కేటాయిస్తే తాను ఎవరితోనైనా కలిసి పని చేసేందుకు సిద్దమని ఆఫర్ చేశారు. తాను కెసిఆర్‌తో పని చేసేందుకు సిద్ధంగా ఉన్నానని అయితే బలహీనవర్గాలకు ఆయన ప్రాధాన్యత ఇవ్వాలని డిమాండ్ చేశారు. నెల రోజులుగా సకల జనుల సమ్మె ఉద్యమం జరుగుతున్నా రోజు రోజుకు బలహీనపడుతోందన్నారు. కెసిఆర్, తెలంగాణ రాజకీయ ఐక్య కార్యాచరణ సమితి అనాలోచిత నిర్ణయాల వల్లే కాకతీయ విశ్వవిద్యాలయం, ఉస్మానియా విశ్వవిద్యాలయాలు మూతపడ్డాయని ఆరోపించారు. వంద మంది శాసనసభ్యులతో రాజీనామాలు చేయించలేని జెఏసి చైర్మన్ కోదండరామ్ యాభై లక్షల మంది విద్యార్థుల జీవితాలతో ఆట ఆడుకుంటున్నారని విమర్శించారు.

దురహంకారంతోనే విద్యాసంస్థల బంద్ అన్నారు. చేతకాని ఎమ్మెల్యేలు వెంటనే రాజీనామాలు చేసి ఉద్యమంలోకి రావాలని పిలుపునిచ్చారు. విద్యార్థుల భవిష్యత్తుతో మాత్రం ఆటాడుకోవద్దన్నారు. వైన్ దుకాణాలు, సినిమా హాళ్లు తెరిచుకుంటున్నాయి కానీ విద్యా సంస్థలు మాత్రం తెరుచకోవడం లేదని ఆరోపించారు. విద్యాసంస్థలను సమ్మె నుండి మినహాయించాలని డిమాండ్ చేశారు. తాము సామాజిక తెలంగాణకు కట్టుబడి ఉన్నామన్నారు.

Published On October 14, 2011