ఆ సత్తా కాంగ్రెసుకు ఉంది: లగడపాటి రాజగోపాల్

By Srinivas

Published: Friday, October 14, 2011, 9:04 [IST]

హైదరాబాద్: కాంగ్రెసు పార్టీ అధిష్టానానికి అతి సున్నితమైన తెలంగాణ సమస్యను పరిష్కరించే సత్తా ఉందని విజయవాడ పార్లమెంటు సభ్యుడు లగడపాటి రాజగోపాల్ గురువారం విలేకరులతో అన్నారు. మరికొద్ది రోజుల్లో సమస్యకు పరిష్కారం చూపిస్తుందన్నారు. సమస్య పరిష్కారానికి పార్టీ తీవ్రంగా కృషి చేస్తోందన్నారు. తెలుగుదేశం, వైయస్సార్ కాంగ్రెసు పార్టీలు తెలంగాణపై పలాయనవాదం అనుసరిస్తున్నాయన్నారు. వారు నిర్ణయం చెప్పకుండా మభ్యపెడుతున్నారని విమర్శించారు. తెలంగాణ అంశంపై తెలుగుదేశం పార్టీ రెండు కళ్ల సిద్ధాంతాన్ని ప్రవచిస్తుంటే వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి శక్తిహీనత ప్రదర్శించి సమస్యను జఠిలం చేస్తున్నారన్నారు.

కాంగ్రెసు అధిష్టానం, కోర్ కమిటీ, ముఖ్యనేతల అభిప్రాయాలు సేకరించి త్వరలో అందరికీ ఆమోదయోగ్యమైన పరిష్కారం చూపగలదని విశ్వాసం వ్యక్తం చేశారు. కృష్ణా జిల్లాలో కాంగ్రెసు పార్టీని మరింత పటిష్టం చేసేందుకు తిరుపతి శాసనసభ్యుడు చిరంజీవితో కలిసి తాను పర్యటనలు జరుపుతానని చెప్పారు.

Published On October 14, 2011