నవంబర్‌లో తెలంగాణపై కాంగ్రెసు నిర్ణయం వెల్లడి

By Pratap

Published: Saturday, October 15, 2011, 15:26 [IST]

హైదరాబాద్: తెలంగాణపై కాంగ్రెసు అధిష్టానం నవంబర్‌లో నిర్ణయం తీసుకుంటుందని తెలంగాణకు చెందిన సీనియర్ మంత్రి కె. జానా రెడ్డి భావిస్తున్నారు. అదే విషయాన్ని ఆయన శనివారం తెలంగాణ ఉద్యోగులకు చెప్పినట్లు తెలుస్తోంది. శనివారం మధ్యాహ్నం తెలంగాణ ఉద్యోగులు కొంత మంది జానా రెడ్డిని కలిసి, రాజీనామా చేయాలని కోరారు. ఆ సమయంలో జానా రెడ్డి ఆ విషయం చెప్పారు. నవంబర్‌లో అత్యున్నత నిర్ణాయక విభాగం కాంగ్రెసు వర్కింగ్ కమిటీ (సిడబ్ల్యుసి) తెలంగాణపై ఓ నిర్ణయం తీసుకుని వెల్లడిస్తుందని ఆయన తెలంగాణ ఉద్యోగులకు చెప్పినట్లు సమాచారం. అప్పటి వరకు వేచి చూసి, ఏ నిర్ణయం రాకపోయినా, తెలంగాణకు వ్యతిరేకంగా నిర్ణయం వచ్చినా తాను మంత్రి పదవికి రాజీనామా చేస్తానని జానా రెడ్డి వారితో చెప్పారు.

మంత్రి పదవికి తాను ఒక్కడినే రాజీనామా చేయడం వల్ల ఉపయోగం ఉండదని, తెలంగాణ మంత్రులంతా కలిసి నిర్ణయం తీసుకుంటే అది ప్రబావం చూపుతుందని ఆయన అన్నారని వార్తలు వస్తున్నాయి. తానొక్కడినే రాజీనామా చేస్తే మంత్రి పదవులకు రాజీనామా చేసిన కోమటిరెడ్డి వెంకటరెడ్డి, జూపల్లి కృష్ణారావు మాదిరిగా ఉండిపోవాల్సి వస్తుందని, దానివల్ల తెలంగాణకు ప్రయోజం ఏమీ ఉండదని ఆయన చెప్పినట్లు సమాచారం. అయినా, తెలంగాణపై ఏం చేయాలనే విషయంపై తాను తీవ్రంగా ఆలోచిస్తున్నానని ఆయన చెప్పారు.

Published On October 15, 2011