తెలంగాణ ప్రకటన వస్తేనే సమ్మె విరమణ: స్వామి గౌడ్

By Pratap

Published: Saturday, October 15, 2011, 14:21 [IST]

హైదరాబాద్: తెలంగాణపై స్పష్టమైన ప్రకటన వస్తేనే తాము సమ్మె విరమిస్తామని తెలంగాణ ఉద్యోగ సంఘాల నాయకులు రాష్ట్ర మంత్రులకు తేల్చి చెప్పారు. తెలంగాణ సాధనే తమ ఏకైక లక్ష్యమని తెలంగాణ ఉద్యోగుల సంఘాల జెఎసి నాయకుడు స్వామి గౌడ్ స్పష్టం చేశారు. మంత్రుల బృందంతో తెలంగాణ ఉద్యోగ సంఘాల నాయకులు చేసిన చర్చలు విఫలమయ్యాయి. సమావేశానంతరం శనివారం స్వామి గౌడ్ మీడియా ప్రతినిధులతో మాట్లాడారు. తెలంగాణ రాష్ట్ర ఏర్పాటుకు స్పష్టమైన ప్రకటనతో పాటు నిర్దిష్ట కాలపరిమితితో రాష్ట్ర ఏర్పాటుకు కేంద్రం నుంచి ప్రకటన వస్తేనే సమ్మె విరమిస్తామని ఆయన చెప్పారు. తమ ఉద్యమాన్ని దశలవారీగా ఉధృతం చేస్తామని శ్రీనివాస గౌడ్ అన్నారు. స్వామి గౌడ్ ప్రకటనతో తాము సమ్మె విరమించబోతున్నట్లు ప్రచారం చేస్తున్నారని, అందులో నిజం లేదని తెలంగాణ ఉద్యోగ సంఘాల జెఎసి నాయకుడు దేవీ ప్రసాద్ అన్నారు. తాము సమ్మె చేస్తుంటే, ప్రజలను సకల జనుల సమ్మెకు సిద్ధం చేయాల్సిన తెలుగుదేశం, కాంగ్రెసు నాయకులు తమ బాధ్యతను నిర్వర్తించడం లేదని ఆయన విమర్శించారు.

తెలంగాణ వచ్చే వరకు సమ్మె విరమించేది లేదని దేవీప్రసాద్ అన్నారు. ఉద్యోగులపై పెట్టిన కేసులను ఎత్తేయాలని తాము కోరినట్లు శ్రీనివాస గౌడ్ చెప్పారు. తెలంగాణపై కేంద్రం చేత సానుకూల ప్రకటన చేయించాలని తాము మంత్రులను కోరినట్లు స్వామిగౌడ్ చెప్పారు. కేంద్రంతో సానుకూల ప్రకటన చేయించాల్సిన బాధ్యత రాష్ట్ర ప్రభుత్వంపై ఉందని ఆయన అన్నారు. ప్రభుత్వోద్యోగుల మూడు డిమాండ్లపై ప్రభుత్వం సానుకూలంగా ఉందని, ఆ డిమాండ్లపై ముఖ్యమంత్రితో మాట్లాడుతామని మంత్రి దానం నాగేందర్ చెప్పారు. చర్చల్లో పురోగతి కనిపించిందని ఆయన అన్నారు. సానుకూల వాతావరణంలోనే తెలంగాణ ఉద్యోగులతో చర్చలు జరిగాయని ఆయన చెప్పారు. తెలంగాణపై కేంద్ర ప్రభుత్వం సీరియస్‌గా ఉందని తాము చెప్పినట్లు ఆయన తెలిపారు. తెలంగాణపై త్వరలో సానుకూల ప్రకటన వస్తుందని ఆశిస్తున్నట్లు ఆయన చెప్పారు.

Published On October 15, 2011