సీల్డ్ కవర్ సిఎం అంటూ జూపల్లి ధ్వజం, అరెస్టు

By Srinivas

Published: Sunday, October 16, 2011, 14:26 [IST]

మహబూబ్ నగర్: మాజీ మంత్రి జూపల్లి కృష్ణారావు ఆదివారం ముఖ్యమంత్రి కిరణ్ కుమార్ రెడ్డిపై తీవ్రస్థాయిలో ధ్వజమెత్తారు. ఆదివారం ఆయన జడ్చర్ల మండలంలోని దివిటిపల్లి దగ్గర జాతీయ రహదారిపై ఆందోళన చేపట్టారు. పోలీసులు ఆయనను అరెస్టు చేశారు. ఈ సందర్భంగా ఆయన సిఎంపై విరుచుకు పడ్డారు. కిరణ్ కుమార్ రెడ్డి ప్రజాభిమానంతో ఎన్నికైన ముఖ్యమంత్రి కాదని సీల్డ్ కవర్‌ ద్వారా ఎన్నికైన వ్యక్తని విమర్శించారు. తెలంగాణకు ప్రధాన అడ్డంకి ముఖ్యమంత్రే అన్నారు. ఆయనన తొలగిస్తే ప్రత్యేక రాష్ట్రానికి ప్రధాన అడ్డంకి తొలగిపోతుందన్నారు. ఆయన తీరు హిట్లర్‌లా ఉందన్నారు. తెలంగాణ ద్రోహుల్లో ముఖ్యమంత్రే ప్రథముడన్నారు.

తెలంగాణ ప్రాంత మంత్రులు రాజీనామా చేసే వరకు సకల జనుల సమ్మె విరమించేది లేదని అన్నారు. మంత్రులకు తెలంగాణ పట్ల చిత్తశుద్ధి ఉంటే వెంటనే రాజీనామా చేయాలని డిమాండ్ చేశారు. సమ్మెలో పాల్గొంటున్న వారిపై ప్రభుత్వం కేసులు ఎత్తి వేయాలన్నారు. లేదంటే తీవ్ర పరిణామాలు ఉంటాయని హెచ్చరించారు. తెలంగాణపై సానుకూల ప్రకటన వచ్చే వరకు సమ్మె కొనసాగుతుందన్నారు.

Published On October 16, 2011