దానంపై గుడ్లు, చితకబాదిన మంత్రి అనుచరులు

By Srinivas

Published: Sunday, October 16, 2011, 16:25 [IST]

హైదరాబాద్: కార్మిక శాఖ మంత్రి దానం నాగేందర్ పైన తెలంగాణవాదులు కోడి గుడ్లతో దాడి చేయడంతో సికింద్రాబాదులో ఆదివారం ఉద్రిక్త పరిస్థితికి దారి తీసింది. తుకారం గేటు ప్రాంతంలో ఓ దవాఖాన ప్రారంభోత్సవానికి మంత్రి దానం నాగేందర్ కారులో వెళ్లారు. ఆయన దవాఖానకు వెళ్లేముందు పలువురు తెలంగాణవాదులు ఆయనను అడ్డగించారు. కోడిగుడ్లతో దాడి చేశారు. దానం అనుచరులు దాడి చేసిన వారిని అడ్డుకొని అక్కడి నుండి తరిమేశారు. అనంతరం కార్యక్రమానికి హాజరై తిరిగి వస్తుండగా మరోసారి దానం కారును అడ్డగించారు. గుడ్లతో దాడి చేశారు.

దీంతో ఆయన అనుచరులు రెచ్చిపోయి వీరంగం సృష్టించారు. వారిని చితకబాదారు. వారు తెలంగాణవాదులపై ఇష్టారీతిగా కర్రలతో దాడి చేసినప్పటికీ మంత్రి చూస్తూ ఉండిపోయారు. ఇరువర్గాల మధ్య పరిస్థితి ఉద్రిక్తంగా మారటంతో పోలీసులు రంగ ప్రవేశం చేసి దానం అనుచరులను అక్కడి నుండి పంపించే ప్రయత్నాలు చేశారు. దానం కారును అడ్డుకున్న తెలంగాణవాదులను అదుపులోకి తీసుకున్నారు. మంత్రి అనుచరుల దాడిలో ఇద్దరికి తీవ్ర గాయాలయ్యాయి.

అయితే మంత్రి అనుచరుల దాడిని ఖండిస్తూ తెలంగాణ న్యాయవాదుల ఐకాస తుకారాం గేటు పోలీసు స్టేషన్ ముందు బైఠాయించింది. తన సమక్షంలోనే ఆయన అనుచరులు తెలంగాణవాదులపై దాడి చేస్తూంటే చూస్తూ ఊరుకోవడం ఏమిటని ప్రశ్నిస్తున్నారు. మంత్రిపైనా, ఆయన అనుచరుల పైన కేసులు పెట్టే వరకు తాము పిఎస్ ముందు నుండి వెళ్లేది లేదని బైఠాయించారు.

Published On October 16, 2011