టిడిపి సహా పార్టీలన్నీ రాజకీయాలే: ఎర్రబెల్లి

By Srinivas

Published: Tuesday, October 18, 2011, 16:32 [IST]

హైదరాబాద్: తెలంగాణపై తెలుగుదేశం పార్టీ సహా తెలంగాణ రాష్ట్ర సమితి, కాంగ్రెసు పార్టీలన్నీ రాజకీయ ప్రయోజనాలకే విలువిస్తున్నాయని టిడిపి సీనియర్ శాసనసభ్యుడు ఎర్రబెల్లి దయాకర్ రావు మంగళవారం వరంగల్ జిల్లాలో అన్నారు. తెలంగాణ కోసం పార్టీలన్నీ చిత్తశుద్ధితో జెండాలు పక్కన పెట్టి ఒకే జెండాతో తెలంగాణే అజెండాగా ఉద్యమించాల్సి ఉందన్నారు. సమైక్యాంధ్ర ఉద్యమం పెట్టుబడిదారుల ఉద్యమమని విమర్శించారు. తెలంగాణ కోసం తాము రాజీనామాలకు సిద్ధంగా ఉన్నామన్నారు. ఇక నుండి రాజీనామా చేయని కాంగ్రెసు నేతలే మా టార్గెట్ అన్నారు.

కాగా అంతకుముందు తెలంగాణలోని పది జిల్లాల్లో తెలుగుదేశం పార్టీ ఆధ్వర్యంలో కలెక్టరేట్‌ల ముట్టడి జరిగింది. నల్గొండ జిల్లాలో మోత్కుపల్లి నర్సింహులు, వరంగల్‌లో ఎర్రబెల్లి దయాకర్ రావు, హైదరాబాదులో దేవేందర్ గౌడ్, ఎమ్మెల్యే మహేందర్ రెడ్డి, ఆయా జిల్లాల్లో ఆయా నేతలు పాల్గొన్నారు. కలెక్టరేట్ల ముట్టడిని పోలీసులు అడ్డుకున్నారు. కొన్ని చోట్ల నేతలను అరెస్టు చేశారు. మరికొన్ని చోట్ల అడ్డుకొన్నారు.

Published On October 18, 2011