మహిళపై దౌర్జన్యం: ఎమ్మెల్యే వేణుగోపాల చారి అరెస్టు

By Srinivas

Published: Tuesday, October 18, 2011, 11:22 [IST]

అదిలాబాద్: ఓ మహిళపై దౌర్జన్యం కేసులో అదిలాబాద్ జిల్లా ముథోల్ శాసనసభ్యుడు వేణుగోపాల చారిని పోలీసులు మంగళవారం అరెస్టు చేశారు. ఆయనను భైంసాలోని ఇంటి వద్ద అరెస్టు చేసిన పోలీసులు నిర్మల్ కోర్టుకు తరలించారు. తెలంగాణ రాజకీయ ఐకాస బందు పిలుపు మేరకు సోమవారం ఎమ్మెల్యే వేణుగోపాల చారి, ఆయన అనుచరులు స్థానిక మార్కెట్‌ను బందు చేయిస్తున్నారు. ఆ సమయంలో జరిగిన తోపులాటలో లక్ష్మీబాయి అనే మహిళకు స్వల్ప గాయాలయ్యాయి. దీంతో ఆమె ఎమ్మెల్యేపై కేసు పెట్టారు.

సోమవారం ఎమ్మెల్యే అందుబాటులో లేక పోవడంతో పోలీసులు మంగళవారం అరెస్టు చేశారు. అయితే తనపై తప్పుడు కేసు బనాయించారని ఎమ్మెల్యే అంటున్నారు. తనకు సంబంధం లేని కేసులో తనను ఇరికించి అప్రతిష్ట పాలు చేయాలని స్థానిక కాంగ్రెసు నేతలు చూస్తున్నారని ఆరోపిస్తున్నారు. దాడికి తనకు ఎలాంటి సంబంధం లేదన్నారు. కాగా దాడిలో గాయపడ్డ మహిళ భైంసా ఏరియా ఆసుపత్రిలో చికిత్స పొందుతోంది.

కాగా ముథోల్ నుండి గత 2009 సాధారణ ఎన్నికలలో తెలుగుదేశం పార్టీ నుండి గెలిచిన వేణుగోపాల చారి ఇటీవల తెలంగాణ ఉద్యమం బలపడుతున్న సమయంలో ఆ పార్టీకి, ఆ పార్టీ ప్రాథమిక సభ్యత్వానికి రాజీనామా చేశారు. తెలంగాణ నగారా సమితి శాసనసభ్యుడు నాగం జనార్ధన్ రెడ్డితో కలిసి తెలంగాణ ఉద్యమంలో పాల్గొంటున్నారు. ఇటీవలె ఎమ్మెల్యే పదవికి రెండోసారి రాజీనామా చేశారు.

Published On October 18, 2011