తిరుపతిలో తెలంగాణవారికి సమైక్యవాదుల సన్మానం

By Srinivas

Published: Tuesday, October 18, 2011, 13:37 [IST]

తిరుపతి/విశాఖపట్నం: సమైక్య రాష్ట్రం కోసం చిత్తూరు జిల్లాలో సమైక్యవాదులు మంగళవారం వినూత్న నిరసన తెలిపారు. తెలంగాణ ప్రాంతం నుండి వెళ్లిన బస్సులను వారు శుభ్రం చేసి వాహనాలకు పూజలు చేసి డ్రైవర్లకు సన్మానం చేసి వినూత్నంగా నిరసన తెలిపారు. సమైక్య రాష్ట్రానికి మద్దతు పలకాలని వారు తెలంగాణ నుండి వెళ్లిన వారిని కోరారు. కాగా విశాఖపట్నం, గుంటూరు, అనంతపురం జిల్లాలలో సమైక్యవాదులు ఆందోళన చేశారు. రాష్ట్రాన్ని సమైక్యాంగానే ఉంచాలని డిమాండ్ చేశారు.

సమైక్య రాష్ట్రానికి పలుకుతూ ప్రభుత్వానికి అండగా ఉండేందుకు మంగళవారం నుండి ఒక గంట పాటు విధులు అదనంగా నిర్వర్తిస్తామని ఉద్యోగులు ప్రకటించారు. మరోవైపు విశాఖలో రాష్ట్రాన్ని సమైక్యంగానే ఉంచాలనే డిమాండుతో సమైక్యాంధ్ర ప్రజా పోరాట సమితి భేటీ నిర్వహించింది. ఈ సమావేశానికి పెందుర్తి శాసనసభ్యుడు రమేష్ బాబు, మాజీ ఎమ్మెల్యే ధర్మశ్రీ తదితరులు పాల్గొన్నారు. రాష్ట్రాన్ని సమైక్యంగానే ఉంచుతామని ప్రకటన చేయకపోతే దీక్షకు దిగుతామని వారు కేంద్రాన్ని హెచ్చరించారు.

Published On October 18, 2011