సోనియా వ్యతిరేకం, తెలంగాణ రాష్ట్రం ఇవ్వదు: నాగం

By Pratap

Published: Tuesday, October 18, 2011, 19:14 [IST]

హైదరాబాద్: కాంగ్రెసు అధ్యక్షురాలు సోనియా గాంధీ తెలంగాణకు వ్యతిరేకమని, తెలంగాణ రాష్ట్రం ఇవ్వదని అర్థమైపోయిందని తెలంగాణ నగారా సమితి నేత నాగం జనార్దన్ రెడ్డి అన్నారు. సోనియా గాంధీ అనుమతితోనే ముఖ్యమంత్రి కిరణ్ కుమార్ రెడ్డి రైల్ రోకో సందర్భంగా సొంత పార్టీ నేతలనే అరెస్టు చేయించారని ఆయన మంగళవారం మీడియా ప్రతినిధులతో అన్నారు. తెలంగాణకు కాంగ్రెసు పార్టీ అడ్డు అని చెప్పడానికి ఇంతకన్నా పెద్ద నిదర్సనం అవసరం లేదని ఆయన అన్నారు. కాంగ్రెసు తెలంగాణ ఇవ్వడానికి సిద్దంగా లేదనేది పూర్తిగా అర్థమైపోయిందని ఆయన అన్నారు.

తెలంగాణకు చెందిన మంత్రులపై ఆయన తీవ్ర వ్యాఖ్యలు చేశారు. ఇకనైనా తెలంగాణ మంత్రులు బానిస బతుకులు వదలాలని ఆయన సూచించారు. సకల జనుల సమ్మెలో తెలంగాణ జెఎసి చొరవ చూపి ముందుకు రాలేదని ఆయన తప్పు పట్టారు. సకల జనుల సమ్మెలో ఉద్యోగులే విజేతలని ఆయన అన్నారు.

Published On October 18, 2011