అన్నా హజారే ప్రాణాలకు ముప్పు, భద్రతపై సమీక్ష

న్యూఢిల్లీ: అవినీతి వ్యతిరేక పోరాటం చేస్తున్న సామాజిక కార్యకర్త అన్నా హజారే ప్రాణాలకు ముప్పు ఉందని కేంద్ర హోం మంత్రిత్వ శాఖ హెచ్చరించినట్లు వార్తలు వచ్చాయి. అన్నా హజారే ప్రాణాలకు ముప్పు ఉందని స్థానిక నిఘా విభాగాలు తెలియజేశాయని కేంద్ర హోం మంత్రిత్వ శాఖ తెలిపింది. అన్నా టీమ్ సభ్యులు ప్రశాంత్ భూషణ్, అర్వింద్ కేజ్రీవాల్‌లపై, అన్నా మద్దతుదారులపై దాడులు జరిగిన నేపథ్యంలో అన్నా హజారేకు కూడా ముప్పు వాటిల్లే అవకాశం ఉందని హెచ్చరికలు జారీ అయ్యాయి.

అన్నా హజారే స్వగ్రామం రాలేగావ్ సిద్ధిలో ఆయన భద్రతపై సమీక్ష జరపాలని మహారాష్ట్ర పోలీసు డైరెక్టర్ జనరల్ అహ్మద్ నగర్ ఎస్పీని ఆదేశించారు. అదనపు పోలీసు బలగాలను పంపాలని కూడా సూచించారు. ప్రస్తుతం అన్నా హజారే తన స్వగ్రామంలో మౌనవ్రతం సాగిస్తున్నారు. హర్యానాలోని హిస్సార్‌లో కాంగ్రెసు అభ్యర్థి డిపాజిట్ కోల్పోవడం అన్నా హజారే వల్లనే జరిగిందనే ప్రచారం కూడా సాగుతోంది. దీంతో ఆయన ప్రాణాలకు ముప్పు ఉంటుందని అనుమానిస్తున్నారు.

English summary

In the wake of Team Anna members Prashant Bhushan and Aravind Kejriwal being attacked, the Maharashtra Director General of Police has ordered a review of Anna Hazare's security.