నా చావుకు సిఎం బాధ్యత వహించాలి: కోమటిరెడ్డి

By Srinivas

Published: Thursday, October 20, 2011, 15:50 [IST]

నల్గొండ: తెలంగాణ కోసం నవంబరు 1నుండి తాను ఆమరణ నిరాహార దీక్ష చేస్తానని ప్రభుత్వం అడ్డుకోవాలని చూస్తే ఆత్మబలిదానానికి సిద్ధపడతానని తాను చనిపోతే అందుకు ముఖ్యమంత్రి కిరణ్ కుమార్ రెడ్డియే బాధ్యత వహించవలసి ఉంటుందని మాజీ మంత్రి కోమటిరెడ్డి వెంకట్ రెడ్డి గురువారం హెచ్చరించారు. తెలుగు తల్లి అంటున్న విజయవాడ పార్లమెంటు సభ్యుడు లగడపాటి రాజగోపాల్ తెలంగాణ కోసం ఆత్మహత్యలు చేసుకున్న అమరవీరుల కుటుంబాలను పరామర్శించారా అని ప్రశ్నించారు. ఆయనకు ఇక్కడి ఆత్మహత్యలు కనిపించడం లేదా అన్నారు. తెలంగాణ ప్రాంత శాసనసభ్యులు, మంత్రులకు చీము, నెత్తురు ఉంటే వెంటనే పదవులకు రాజీనామా చేయాలని డిమాండ్ చేయాలన్నారు. సమాధులు, దిష్టి బొమ్మలు చూసినా బాధ కలగడం లేదా అని ప్రశ్నించారు.

తెలంగాణ మంత్రులు రాజీనామా చేస్తే కేంద్రం తప్పక దిగి వస్తుందన్నారు. తెలంగాణ సాధన కోసం అందరూ కలిసి రావాలని ఆయన విజ్ఞప్తి చేశారు. కాగా ఈ నెల 1వ తారీఖున మంత్రి కోమటిరెడ్డి తన మంత్రి పదవికి, శాసనసభ్యత్వానికి రాజీనామా చేసిన విషయం తెలిసిందే. ఆయన రాజీనామాను గవర్నర్ నరసింహన్ ఆమోదించారు కూడా. శాసనసభ్యత్వ రాజీనామా ఆమోదించుకుంటానని ఆయన చెప్పారు.

Published On October 20, 2011