తెలంగాణలో ఆత్మహత్యలు - సోనియా కేసు వాయిదా

By Srinivas

Published: Thursday, October 20, 2011, 16:24 [IST]

న్యూఢిల్లీ: తెలంగాణలో జరిగిన ఆరువందలకు పైగా ఆత్మహత్యలకు ఏఐసిసి అధ్యక్షురాలు సోనియా గాంధీయే కారణమన్న కేసును పాటియాలా కోర్టు నవంబరు పదిహేను తేదికి వాయిదా వేసింది. ఆత్మహత్యలకు కారణం సోనియా గాంధీయే అన్న కేసులో సాక్ష్యులుగా ఆత్మహత్యలు చేసుకున్న కుటుంబాలను తీసుకు వస్తానని కేసు వేసిన న్యాయవాది అరుణ్ కుమార్ అన్నారు. కాగా అరుణ్ కుమార్ రెండు రోజులు క్రితం సుప్రీం కోర్టు, జాతీయ మానవ హక్కుల కమిషన్, పాటియాలా కోర్టులో వేసిన విషయం తెలిసిందే. ఆయన పిల్ పాటియాల కోర్టు స్వీకరించి గురువారం విచారించి వాయిదా వేసింది.

2009 డిసెంబర్ 9న తెలంగాణ రాష్ట్రం ఇస్తామని చెప్పి ఆ తర్వాత మాట మార్చడం ద్వారా సోనియా గాంధీ పరోక్షంగా ఆత్మహత్యలకు కారణమయ్యారని ఆయన తన పిల్‌లో ఆరోపించారు. కాంగ్రెసు పలుసార్లు తెలంగాణపై హామీ ఇచ్చి తెలంగాణ ప్రజలను ఆశ పెట్టి మళ్లీ వెనక్కి పోయిందని విమర్శించారు. కేంద్రం హామీ నిలబెట్టుకోక పోవడం వల్లనే తెలంగాణలో ఆత్మహత్యలు చేసుకున్నారని ఆయన అందులో ఆరోపించారు. కలిసి ఉన్న తెలంగాణ ప్రజల మధ్య వారు చిచ్చు పెట్టారని విమర్శించారు.

Published On October 20, 2011