సకల జనుల సమ్మె: కోదండరామ్ ఇంటి ముట్టడి, ఉద్రిక్తత

By Srinivas

Published: Friday, October 21, 2011, 12:38 [IST]

హైదరాబాద్: ప్రత్యేక తెలంగాణ సాధించే వరకు సకల జనుల సమ్మె కొనసాగుతుందని ప్రకటించి ఇప్పుడు అర్ధాంతరంగా ఎందుకు ఆపేశారో చెప్పాలంటూ గజ్జేల కాంతం ఆధ్వర్యంలో ప్రజా సంఘాల ఐక్య కార్యాచరణ సమితి శుక్రవారం తార్నాకలోని తెలంగాణ రాజకీయ ఐక్య కార్యాచరణ సమితి చైర్మన్ ఆచార్యా కోదండరామ్ ఇంటిని ముట్టడించారు. తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుతో కోదండరామ్ ఢిల్లీ ఎందుకు వెళ్లారో చెప్పాలని, ఢిల్లీ వెళ్లొచ్చాకే సమ్మె తిరుగు ముఖం పట్టిందని వారు ఆరోపించారు. కోదండరామ్ ఉద్యమం పేరుతో వసూళ్లకు పాల్పడుతున్నారన్నారు. కాంట్రాక్టులు ఇప్పించడంపై వివరణ ఇవ్వాలని డిమాండ్ చేశారు.

కోదండరామ్ ఇంటిని ముట్టడించిన గజ్జెల కాంతం తదితరులను పోలీసులు అదుపులోకి తీసుకున్నారు. కాగా ప్రజా సంఘాల ఐకాస ముట్టడిని తెలంగాణ ఐకాస అధికార ప్రతినిధి దయాకర్ ఖండించారు. సమ్మెలో పాల్గొనని వారు సమ్మె ఎందుకు విరమించారని అడగటం ఏమిటని ప్రశ్నించారు. సమ్మె విరమిస్తున్నట్లు కోదండరామ్ ఎక్కడా చెప్పలేదన్నారు. వ్యక్తిగత ప్రయోజనాల కోసమే వారు కోదండరామ్ ఇంటిని ముట్టడించారన్నారు.

Published On October 21, 2011