తెలంగాణపై తేల్చండి: సోనియాతో సిఎం కిరణ్

By Srinivas

Published: Saturday, October 22, 2011, 11:29 [IST]

న్యూఢిల్లీ: తెలంగాణ సమస్యను సాధ్యమైనంత తొందరగా పరిష్కరించమని ముఖ్యమంత్రి కిరణ్ కుమార్ రెడ్డి ఏఐసిసి అధ్యక్షురాలు సోనియా గాంధీని కోరినట్లుగా సమాచారం. శుక్రవారం ఢిల్లీ వెళ్లిన సిఎం కిరణ్ శనివారం ఉదయం సోనియాతో భేటీ అయ్యారు. మొదట ఆమె ఆరోగ్యంపై వాకబు చేశారు. అనంతరం ప్రస్తుతం రాష్ట్రంలో ఉన్న పరిస్థితులపై వివరించారని సమాచారం. సకల జనుల సమ్మె, తెలంగాణ, ఎమ్మెల్సీ తదితర అంశాలపై సోనియాతో చర్చించినట్లుగా తెలుస్తోంది. రాష్ట్రంలో ప్రస్తుతం ప్రశాంత వాతావరణం నెలకొన్నదని ఎలాంటి ఉద్రిక్త పరిస్థితులు లేవని చెప్పినట్లుగా సమాచారం. రాష్ట్ర పరిస్థితులు అదుపులోనే ఉన్నాయని చెప్పారట.

అయితే తెలంగాణ అంశాన్ని త్వరగా తేల్చితే బావుంటుందని ఆయన సోనియాతో అభిప్రాయపడినట్లుగా సమాచారం. అలాగే ఇటీవలే తమిళనాడు గవర్నర్‌గా వెళ్లిన మాజీ ముఖ్యమంత్రి కొణిజేటి రోశయ్య శాసనమండలి స్థానం ఖాళీ కావడంతో దానిని భర్తీ చేసే అంశంపైన కూడా చర్చించారని సమాచారం. అనంతరం ముఖ్యమంత్రి జాతీయ అభివృద్ధి మండలి సమావేశానికి వెళ్లారు. సోనియాతో పది నిమిషాలు భేటీ అయ్యారు. సోనియాతో భేటీ కారణంగా సమావేశానికి ముఖ్యమంత్రి కాస్త ఆలస్యంగా హాజరయ్యారు. కాగా సోనియా సర్జరీ తర్వాత సిఎం మొదటిసారి భేటీ అయ్యారు.

Published On October 22, 2011