జానారెడ్డి ఇంటికి ఉద్యోగుల బైక్ ర్యాలీ, అరెస్టు

By Srinivas

Published: Sunday, October 23, 2011, 12:27 [IST]

నల్గొండ: ఉద్యోగులు వెంటనే సమ్మె విరమించాలన్న పంచాయతీ రాజ్ శాఖ మంత్రి జానారెడ్డి వ్యాఖ్యల దుమారం ఇంకా చల్లారలేదు. నల్గొండ జిల్లా ఉద్యోగ సంఘాల నేతలు ఆదివారం ఉదయం జిల్లాలోని నల్గొండ, మిర్యాలగూడ తదితర ప్రాంతాల నుండి నాగార్జున సాగర్‌లోని జానారెడ్డి ఇంటికి బైకు ర్యాలీగా బయలు దేరారు. పోలీసులు వారిని ఎక్కడికి అక్కడే అడ్డుకొని అదుపులోకి తీసుకున్నారు. జానా ఇంటికి ఎవరూ వెళ్లకుండా అడ్డుకున్నారు. దీంతో నాగార్జున సాగర్ రోడ్డులో ఉద్రిక్త పరిస్థితి ఏర్పడింది. ఈ సందర్భంగా ఉద్యోగులు మాట్లాడారు. సకల జనుల సమ్మెను విరమించాలని జానారెడ్డి కోరటం తెలంగాణ ద్రోహమేనన్నారు.

తమను సమ్మె విరమించాలని కోరటం కాకుండా ఆయనే తన మంత్రి పదవికి రాజీనామా చేసి తెలంగాణ ఉద్యమంలో పాలుపంచుకోవాలని డిమాండ్ చేశారు. కాగా బైక్ ర్యాలీ చేస్తున్న ఉద్యోగులను అరెస్టు చేయడం పట్ల మాజీ మంత్రి కోమటిరెడ్డి వెంకట్ రెడ్డి తీవ్రంగా ఖండించారు. అరెస్టు చేసిన ఉద్యోగులను వెంటనే విడుదల చేయాలని డిమాండ్ చేశారు. జానారెడ్డి కూడా మంత్రి పదవికి రాజీనామా చేసి తమతో కలిసి రావాలన్నారు.

Published On October 23, 2011