40 మంది ప్రముఖులకు డ్రగ్స్ సరఫరా: సిపి ఖాన్

By Pratap

Published: Tuesday, October 25, 2011, 17:46 [IST]

హైదరాబాద్: హైదరాబాదు నగరంలోని 40 మంది ప్రముఖులకు డ్రగ్స్ సరఫరా అవుతున్నట్లు హైదరాబాద్ పోలీసు కమిషనర్ ఎకె ఖాన్ చెప్పారు. ఈ ప్రముఖుల్లో న్యాయవాదులు, వ్యాపారులు, సినీ ప్రముఖులు తదితరులు ఉన్నారని ఆయన మంగళవారం మీడియా ప్రతినిధుల సమావేశంలో చెప్పారు. సాక్ష్యాలు లేకపోవడం వల్ల వారిని పట్టుకోలేకపోతున్నామని ఆయన అన్నారు. హైదరాబాద్ వెస్ట్ జోన్ పోలీసులు ఓ అంతర్జాతీయ డ్రగ్స్ ముఠా గుట్టు రట్టు చేసిన నేపథ్యంలో ఆయన మీడియా సమావేశం ఏర్పాటు చేసి వివరాలు వెల్లడించారు. బెంగుళూర్ నుంచి హైదరాబాదుకు లారీలో డ్రగ్స్ రవాణా చేస్తుండగా పోలీసులు రెడ్ హ్యాండెడ్‌గా పట్టుకున్నట్లు ఆయన తెలిపారు. లారీ డ్రైవర్‌ను, ఆంథోనీ అనే వ్యక్తిని అరెస్టు చేసినట్లు ఆయన తెలిపారు. వారిద్దరని ఆయన మీడియా ముందు ప్రవేశపెట్టారు.

హాలెండు నుంచి హైదరాబాదుకు మాదక ద్రవ్యాలు స్మగుల్ అవుతున్నట్లు ఆయన తెలిపారు. హైదరాబాదులోని ఇంజనీరింగ్ విద్యార్థులను లక్ష్యంగా చేసుకుని ఈ మాదకద్రవ్యాల సరఫరా జరుగుతున్నట్లు ఆయన తెలిపారు. ఈ ముఠా హాలెండ్‌లోని ఫ్రాంక్ అనే వ్యక్తి నేతృత్వంలో నడుస్తున్నట్లు ఆయన తెలిపారు. డ్రగ్స్‌కు పెద్ద మొత్తంలో వసూలు చేస్తూ డబ్బు చేసుకుంటున్నారని ఆయన చెప్పారు.

Published On October 25, 2011