కార్డుల జారీలో తోపులాట, వృద్ధురాలు మృతి

గుంటూరు: జిల్లాలో వికలాంగుల ధృవీకరణ పత్రాల జారీ శిబిరంలో తోపులాట జరిగి ఓ వృద్ధురాలు మృతి చెందింది. జిల్లాలోని నరసారావు పేట మండలం మక్కెనవారి పాలెం గ్రామానికి చెందిన రోశమ్మ అనే వృద్ధురాలు వికలాంగుల ధృవీకరణ పత్రాల కోసం మంగళవారం ఉదయం ప్రభుత్వ ఆసుపత్రికి వచ్చింది. అయితే క్యూ లైన్లో తోపులాట జరిగి ఆ వృద్ధురాలు క్రింద పడిపోయింది. దీంతో ఆమె అక్కడికక్కడే శిబిరంలో కూలబడిపోయింది. ఈమె గత మూడు రోజుల నుండి శిబిరానికి కార్డు కోసం వస్తున్నారు. తోపులాటకు సరియైన ఏర్పాట్లు లేకపోవడమే కారణమని కార్డు కోసం వచ్చిన వారు ఆరోపిస్తున్నారు.

మరొక వృద్ధురాలి పరిస్థితి విషమంగా ఉండటంతో ఆసుపత్రికి తరలించారు. పెదకాకాని మండలం బుడంపాడు గ్రామానికి చెందిన ఎం.ధర్మారావు అనే వ్యక్తి తోపులాటలో అపస్మారక స్థితిలోకి వెళ్లగా ఆసుపత్రిలో చేర్పించి చికిత్స అందిస్తున్నారు.

English summary

An old woman died in clash at Narsarao pet of Guntur district today.