అనంత టిడిపి నేతపై వేట కొడవళ్లతో ప్రత్యర్థుల దాడి

By Srinivas

Published: Thursday, October 27, 2011, 9:16 [IST]

అనంతపురం: జిలాల్లో తెలుగుదేశం పార్టీ నేతపై ప్రత్యర్థులు గురువారం తెల్లవారుజామున వేటకొడవళ్లతో దాడి చేశారు. అనంతపురం జిల్లాలోని యల్లనూరు మండలం పెద్దమల్లేపల్లిలో తెలుగుదేశం పార్టీ మాజీ సర్పంచ్ లక్ష్మయ్య ఇంట్లో నిద్రిస్తుండగా తెల్లవారుజామున మూడు గంటల సమయంలో కొందరు దుండగులు వేటకొడవళ్లతో దాడి చేయడంతో అతనికి తీవ్ర గాయాలయ్యాయి. ప్రాణాపాయస్థితిలో ఉన్న లక్ష్మయ్యను కర్నూలు జిల్లా ఆసుపత్రికి తరలించారు. గత పంచాయతీ ఎన్నికలకు ముందు లక్ష్మయ్యకు చెందిన చీనీ చెట్లను కూడా గుర్తు తెలియని వ్యక్తులు నరికి వేశారు.

గ్రామంలో రేషన్ షాపు కేటాయింపు వివాదం కూడా నడుస్తోందని సమాచారం. అయితే ఎవరు, ఎందుకు చంపారో ఖచ్చితంగా తెలియనప్పటికీ రేషన్ షాపు వివాదానికి సంబంధించి ప్రత్యర్థి వర్గం ఆయనపై దాడి చేసి ఉండవచ్చని బాధితులు ఆరోపిస్తున్నారు. పోలీసులు కేసు నమోదు చేసుకొని దర్యాఫ్తు చేస్తున్నారు.

Published On October 27, 2011