బూతు బొమ్మల మాస్టారొద్దంటూ పాఠశాలకు తాళం

By Srinivas

Published: Thursday, October 27, 2011, 13:59 [IST]

కడప: బూతు బొమ్మలు చూపే ఉపాధ్యాయుడు మాకొద్దంటూ కడప జిల్లా ఓ గ్రామ ప్రజలు పాఠశాలకు తాళం వేసి నిరసన తెలుపుతున్నారు. బోడిరెడ్డి అనే ఉపాధ్యాయుడు ఓ గ్రామంలో ఉపాధ్యాయుడిగా పని చేసేవాడు. అయితే పాఠశాలలో పాఠాలు చెప్పడం మానేసి విద్యార్థులకు తన లాప్ టాప్‌లో అశ్లీల దృశ్యాలు చూపడం, వారితో అసభ్యంగా మాట్లాడటం చేసే వాడట. ఓసారి పాఠశాల ఆవరణలో నగ్నంగా స్నానం చేసినట్లు ఆరోపణలు ఉన్నాయి. దీంతో విద్యార్థుల తల్లిదండ్రులు అతనిని అక్కడ నుండి పంపించి వేయాలని అధికారులకు మొర పెట్టుకున్నారు. దీంతో అధికారులు అతనిని గత జనవరిలో సస్పెండ్ చేశారట. తొమ్మిది నెలల అనంతరం ఇటీవలె అతనికి మరో గ్రామంలో పోస్టింగ్ వచ్చింది. బోడిరెడ్డి అక్కడి నుండి పాత గ్రామానికి మార్పించుకున్నారు.

పాత మాస్టారే వస్తున్నాడని తెలిసిన గ్రామస్తులు పాఠశాలకు తాళం వేసి నిరసన తెలిపారు. పాఠశాల వద్ద ఆందోళన చేపట్టారు. అతను వస్తే తమ పిల్లలకు చదువు వద్దు ఏమీ వద్దు ఇంట్లో కూర్చుండ బెట్టుకుంటామని హెచ్చరిస్తున్నారు. కాగా తాను ఎలాంటి తప్పు చేయలేదని అనవసరంగా కొందరు తనపై ఆరోపణలు చేస్తున్నారని సదరు ఉపాధ్యాయుడు ఆవేదన వ్యక్తం చేస్తున్నారు. తనను రాకుండా అడ్డుకోవడం సరికాదని వాపోతున్నారు.

Published On October 27, 2011