జగన్ పార్టీ నేత చెవిరెడ్డి భాస్కర రెడ్డి అరెస్టు

By Pratap

Published: Thursday, October 27, 2011, 19:19 [IST]

తిరుపతి: వైయస్ జగన్మోహన్ రెడ్డి నాయకత్వంలోని వైయస్సార్ కాంగ్రెసు పార్టీ నాయకుడు చెవిరెడ్డి భాస్కర రెడ్డిని గురువారం పోలీసులు అరెస్టు చేశారు. అటవీ శాఖ అధికారిపై దాడి చేసిన కేసులో ఆయనను పోలీసులు అరెస్టు చేశారు. అరెస్టును అడ్డుకోవడానికి ప్రయత్నించిన చెవిరెడ్డి భాస్కర రెడ్డి అనుచరులపై పోలీసులు లాఠీచార్జీ చేశారు. తిరుపతిలో అరెస్టు చేసిన చెవిరెడ్డి భాస్కర రెడ్డిని పోలీసులు చంద్రగిరి పోలీసు స్టేషనుకు తరలించారు.

తనపై పోలీసులు అక్రమ కేసు బనాయించారని ఆరోపిస్తూ చెవిరెడ్డి భాస్కర రెడ్డి తన అనుచరులతో ధర్నాకు దిగారు. అంతకు ముందు ఎస్పీ కార్యాలయానికి వెళ్లారు. అక్కడ ఉద్రిక్త వాతావరణం ఏర్పడింది. ఈ స్థితిలో పోలీసులు చెవిరెడ్డి భాస్కర రెడ్డిని అరెస్టు చేశారు. చెవిరెడ్డి భాస్కర రెడ్డి వెంట ఎస్పీ కార్యాలయానికి శాసనసభ్యుడు రవి కూడా వచ్చారు. వేధింపు చర్యల్లో భాగంగానే చెవిరెడ్డి భాస్కర రెడ్డిపై కేసు పెట్టారని ఆయన ఆరోపించారు. మంత్రి గల్లా అరుణకుమారి ప్రోద్బలంతోనే తమను వేధిస్తున్నారని ఆయన విమర్శించారు. అటవీశాఖ అధికారులను తాను కొట్టలేదని చెవిరెడ్డి భాస్కర రెడ్డి అన్నారు.

Published On October 27, 2011