తర్వాత ఏం చేద్దాం?: కోర్ కమిటీలో తెలంగాణపై చర్చ

By Srinivas

Published: Friday, October 28, 2011, 20:16 [IST]

న్యూఢిల్లీ: కాంగ్రెసు పార్టీ కోర్ కమిటీ శుక్రవారం ప్రధాని మన్మోహన్ సింగ్ నివాసంలో భేటీ అయి తెలంగాణపై చర్చించినట్లుగా తెలుస్తోంది. ఇటీవల కేంద్ర మంత్రి, రాష్ట్ర వ్యవహారాల ఇంచార్జ్ గులాం నబీ ఆజాద్ సకల జనుల సమ్మె విరమించాలని విజ్ఞప్తి చేసిన విషయం తెలిసిందే. దీంతో ప్రస్తుతానికి సమ్మె సద్దుమణిగినప్పటికీ భవిష్యత్తులో ఇలాంటి పరిస్థితులు ఎదురు కాకుండా ఏం చేయాలనే విషయంపై సీరియస్‌గా చర్చించినట్లు తెలుస్తోంది. ఇప్పటికే రెండు దఫాలుగా రాష్ట్ర నేతలతో చర్చించిన ఆజాద్ దేశ ప్రయోజనాల దృష్ట్యా సమ్మె విరమించాలని కోరారు. సమ్మె విరమణ తర్వాత తీసుకోవాల్సిన చర్యలుపై వారు చర్చించారని సమాచారం.

ఇప్పటికే రాష్ట్ర స్థాయిలో చర్చలు పూర్తయ్యాయి కాబట్టి తర్వాత ఎవరెవరితో చర్చలు జరపాలి, ఎప్పుడు జరపాలి, ఎప్పటిలోగా చర్చలు పూర్తి చేయాలనే అంశంపై చర్చించినట్లుగా తెలుస్తోంది. కాగా ఈ సమావేశంలో త్వరలో రాబోయే జమ్ము కాశ్మీర్, ఉత్తర ప్రదేశ్ ఎన్నికల నేపథ్యంలో ఎన్నికల సంస్కరణలపై చర్చించినట్లుగా తెలుస్తోంది. ఈ కోర్ కమిటీ భేటీలో ఏఐసిసి అధ్యక్షురాలు సోనియా గాంధీ, ప్రధాన మంత్రి మన్మోహన్ సింగ్, కేంద్ర మంత్రులు అహ్మద్ పటేల్, గులాం నబీ ఆజాద్, చిదంబరం, ఎకే ఆంటోనీ తదితరులు పాల్గొన్నారు.

Published On October 28, 2011