ప్రియుడి గొంతు కోసిన ప్రియురాలు: విశాఖలో దారుణం

By Srinivas

Published: Friday, October 28, 2011, 12:56 [IST]

విశాఖపట్నం/నిజామాబాద్: ప్రియుడిపై ప్రియురాలే కత్తితో దాడి చేసి గాయపర్చిన సంఘటన విశాఖపట్నం జిల్లాలో శుక్రవారం చోటు చేసుకుంది. జిల్లాలోని పాడేరు మండలంలో భూపాల్, ఈశ్వరమ్మలు కొన్నాళ్లపాటు ప్రేమించుకున్నారు. ఈ విషయం పెద్దవాళ్లకు తెలియడంతో ఆరు నెలల క్రితం వారి ప్రేమకు పుల్ స్టాప్ పడింది. రెండు నెలలుగా వారు మళ్లీ మాట్లాడుకుంటున్నారు. అప్పటి నుండి తనను పెళ్లి చేసుకోవాలని యువతి అతనిని అడగడంతో ఆతను నిరాకరిస్తూ వస్తున్నాడు. శుక్రవారం కూడా అతను పెళ్లికి నిరాకరించడంతో ఆ యువతి అతనిపై దాడి చేసి గొంతు కోసింది. అతని పరిస్థితి విషమంగా ఉండటంతో హాస్పిటల్ తరలించారు. యువతితో విడిపోయాక అతనికి పెళ్లైనట్లుగా సమాచారం.

నిజామాబాద్ జిల్లాలో శుక్రవారం ఉదయం జరిగిన ఘోర రోడ్డు ప్రమాదంలో ఆరుగురు మృతి చెందగా, మరో ఆరుగురు తీవ్ర గాయాల పాలయ్యారు. నిజామాబాద్ జిల్లా మోర్తాడ్ సమీపంలో ఓ సుమో టైరు పేలింది. దీంతో అదుపు తప్పిన సుమో ఓ ద్విచక్ర వాహనాన్ని ఢీకొంది. ఈ ప్రమాదంలో ఆరుగురు అక్కడికక్కడే మృతి చెందారు. మరో ఆరుగురికి తీవ్ర గాయాలవడంతో ఆర్మూర్ ప్రైవేటు హాస్పిటల్ తరలించారు. సుమోలో పదకొండు మంది ఉన్నారు. వారంతా మహారాష్ట్రకు చెందిన ధర్మాబాద్‌కు చెందిన వారిగా పోలీసులు గుర్తించారు. మహారాష్ట్ర నుండి అదిలాబాద్ జిల్లాలోని మంచిర్యాల వస్తుండగా ఈ ప్రమాదం చోటు చేసుకుంది.

Published On October 28, 2011