పాల డబ్బులతో చంద్రబాబు పార్టీ: కెసిఆర్ కూతురు

By Pratap

Published: Friday, October 28, 2011, 14:48 [IST]

హైదరాబాద్: తెలంగాణ రాష్ట్ర సమితి (తెరాస) నేతలపై తీవ్ర వ్యాఖ్యలు చేసిన తెలుగుదేశం పార్టీ అధ్యక్షుడు నారా చంద్రబాబు నాయుడిపై కెసిఆర్ కూతురు, తెలంగాణ జాగృతి అధ్యక్షురాలు కల్వకుంట్ల కవిత తీవ్రంగా మండిపడ్డారు. కేంద్ర మంత్రి షెల్జాను కలిసిన అనంతరం ఆమె శుక్రవారం మీడియా ప్రతినిధులతో మాట్లాడారు. ప్రపంచంలో ఏ పార్టీ అయినా చందాలతోనే నడుస్తుందని, పాల వ్యాపారంతో వచ్చే డబ్బులతోనే చంద్రబాబు తెలుగుదేశం పార్టీని నడుపుతున్నారని ఆమె అన్నారు. రాజకీయ పార్టీలు విరాళాలు తీసుకోవడంలో తప్పు లేదని ఆమె అన్నారు. రాజకీయ దురుద్దేశంతోనే చంద్రబాబు కెసిఆర్‌పై విమర్శలు చేస్తున్నారని ఆమె వ్యాఖ్యానించారు.

తెలంగాణ ఉద్యమానికి విరామమే తప్ప విరమణ లేదని కవిత అన్నారు. పోలవరం ప్రాజెక్టును రద్దు చేయాలని తాము ఇదివరకే కేంద్ర ప్రభుత్వాన్ని కోరినట్లు ఆమె గుర్తు చేశారు. తెలంగాణ ఉద్యమాన్ని మళ్లీ ఉధృతం చేస్తామని ఆమె చెప్పారు. ఆవసరమైతే కెసిఆర్ మళ్లీ దీక్ష చేస్తారని ఆమె అన్నారు. తెలంగాణ ఉద్యోగ సంఘాల జెఎసి నాయకుడు స్వామి గౌడ్‌పై వస్తున్న ఆరోపణల వెనక కుట్ర ఉందని ఆమె అన్నారు. చార్మినార్ పునర్వైభవంకోసం ప్రత్యేక నిధులు కేటాయించాలని తాను షెల్జాను కోరినట్లు ఆమె తెలిపారు.

Published On October 28, 2011