ఆమరణ దీక్షపై తగ్గమన్న ఎంపీలు నో అన్న కోమటిరెడ్డి

By Srinivas

Published: Friday, October 28, 2011, 19:22 [IST]

హైదరాబాద్: తెలంగాణ కోసం చేయాలని తలపెట్టిన ఆమరణ దీక్షను విరమించాలన్న తెలంగాణ కాంగ్రెసు పార్లమెంటు సభ్యుల విజ్ఞప్తిని మాజీ మంత్రి కోమటిరెడ్డి వెంకట్ రెడ్డి శుక్రవారం సున్నితంగా తిరస్కరించారు. ప్రత్యేక తెలంగాణ రాష్ట్రం డిమాండ్ చేస్తూ నవంబర్‌లో నల్గొండలో లక్ష మందితో ఆమరణ దీక్ష చేస్తానని ప్రకటించిన విషయం తెలిసిందే. శుక్రవారం సాయంత్రం తొమ్మిది మంది పార్లమెంటు సభ్యులు కోమటిరెడ్డి వెంకట్ రెడ్డి ఇంటికి వెళ్లారు. ఆయనతో కాసేపు భేటీ అయ్యారు. ఈ సందర్భంగా వారు తాము పార్లమెంటులో తెలంగాణ కోసం పోరు చేస్తామని, అవసరమైతే సభలను అడ్డుకుంటామని మీరు దీక్షను రద్దు చేసుకోవాలని విజ్ఞప్తి చేశారు.

వారి విన్నపాన్ని ఆయన సున్నితంగా తిరస్కరించారు. తాను దీక్షపై వెనక్కి తగ్గేది లేదన్నారు. అనంతరం కోమటిరెడ్డి మీడియాతో మాట్లాడుతూ దీక్ష విరమించాలని ఎంపీలు తనను కోరారని కానీ తాను ఎట్టి పరిస్థితుల్లోనూ దీక్షపై వెనక్కి తగ్గేది లేదన్నారు. దీక్ష యథాతథంగా ఉంటుందన్నారు. సానుకూల ప్రకటన వచ్చే వరకు తాను దీక్ష కొనసాగిస్తానని చెప్పారు. ఎంపీలు మాట్లాడుతూ తెలంగాణపై కేంద్రం పదిహేను రోజుల్లో నిర్ణయం ప్రకటించే అవకాశముందన్నారు. కేంద్రం నుండి సానుకూల ప్రకటన వస్తుందని వారు ఆశాభావం వ్యక్తం చేశారు.

Published On October 28, 2011