కెవిపి, టిఆర్ఎస్ బినామీలకు టెండర్లు: శంకర్ రావు

By Srinivas

Published: Friday, October 28, 2011, 18:58 [IST]

హైదరాబాద్: తెలంగాణ రాష్ట్ర సమితి అగ్రనేతలు, కెవిపి రామచంద్రా రావు బినామీలకు పోలవరం టెండర్లు దక్కాయని చేనేత, జౌళీ శాఖ మంత్రి శంకర్ రావు శుక్రవారం ఆరోపించారు. పోలవరం టెండర్లలో తీవ్ర అవకతవకలు జరిగాయన్నారు. దీనిపై తాను అవసరమైతే హైకోర్టుకు వెళతానని శంకర్ రావు చెప్పారు. పోలవరం టెండర్లు చివరి రోజు ష్యూ కంపెనీకి దక్కడంపై పలు అనుమానాలకు తావిస్తోందని ఆయన అభిప్రాయపడ్డారు. రాజకీయ ఒత్తిళ్లకు లోబడి టెండర్ల కేటాయింపు జరిగిందని ఆయన ఆరోపించారు.

ఈ టెండర్ల వల్ల ప్రభుత్వానికి చెడ్డ పేరు వస్తుందన్నారు. అందుకే తాను ఈ వ్యవహారంపై ఏఐసిసి అధ్యక్షురాలు సోనియా గాంధీ సహా పలువురు పార్టీ అగ్రనేతలకు లేఖ రాసినట్లు చెప్పారు. ముఖ్యమంత్రి స్థాయి వరకు పలువురు సమావేశాలు ఏర్పాటు చేసి అధికారులపై ఒత్తిడి తీసుకు వచ్చినట్లుగా ఆరోపణలు వస్తున్నాయన్నారు.

Published On October 28, 2011