బిటెక్ విద్యార్థిని స్వాతి హత్య: ప్రేమోన్మాది ఆత్మహత్య

By Pratap

Published: Sunday, October 30, 2011, 10:30 [IST]

వరంగల్: స్వాతి అనే బిటెక్ విద్యార్థినిని హత్య చేసిన ప్రేమోన్మాది నజీర్ ఆత్మహత్య చేసుకున్నాడు. అతని శవం వరంగల్ జిల్లా కోమటిపల్లి రైల్వే ట్రాక్‌పై పడి ఉంది. గతంలో వరంగల్ జిల్లాలో ఇద్దరు విద్యార్థినులపై దాడి చేసిన ముగ్గురు వ్యక్తులు ఎన్‌కౌంటర్ అయిన నేపథ్యంలో భయానికి లోనై నజీర్ ఆత్మహత్య చేసుకున్నట్లు అనుమానిస్తున్నారు. అతను రైలు కింద పడి ఆత్మహత్య చేసుకున్నట్లు భావిస్తున్నారు. స్వాతి అనే 24 బిటెక్ విద్యార్థినిని గొంతు కోసి నజీర్ హత్య చేశాడు. వరంగల్ జిల్లా ధర్మసాగర్ మండలం మల్లికుదురు గ్రామానికి చెందిన స్వాతి సోమిడి సమీపంలోని తాళ్ల పద్మావతి కళాశాలలో ఇంజనీరింగ్ చివరి సంవత్సరం చదువుతోంది. శనివారం సాయంత్రం 7 గంటల ప్రాంతంలో స్వాతి తన స్నేహితురాళ్లతో కలిసి రోడ్డు మీద నిల్చొని ఉండగా నజీర్ అటుగా వచ్చి దాడి చేసి స్వాతి గొంతు కోశాడు. కడుపులో పది సార్లు కత్తితో పొడిచాడు. వరంగల్ ఎంజిఎం ఆస్పత్రిలో చికిత్స పొందుతూ స్వాతి మరణించింది. స్వాతి దాడి చేసి పారిపోయిన నజీర్ ఆదివారం ఉదయం రైల్వే ట్రాక్‌పై శవమై తేలాడు. నజీర్ ప్రేమ పేరుతో స్వాతిని వేధిస్తూ ఉండేవాడు. తన ప్రేమను అంగీకరించలేదనే కోపంతో నజీర్ ఈ దాడి చేశాడు.

కాగా, నిజామాబాద్ జిల్లా కామారెడ్డి స్పేహపురికి చెందిన రఫియా అనే 17 ఏళ్ల ఇంటర్ రెండో సంవత్సరం విద్యార్థినిపై లక్ష్మణ్ యువకుడు దాడి చేసి చంపాడు. రఫియా ఇంటిలోనే అతను అద్దెకు ఉంటున్నాడు. శనివారం రాత్రి తన గదిలోకి పిలిచి అక్కడ రోకలిబండతో రఫియా తలపై బాదాడు. కత్తి, బ్లేడుతో విచక్షణారహితంగా రఫియాపై దాడి చేశాడు. అదే కత్తితో అతను గొంతు కోసుకున్నాడు. విషయం తెలుసుకున్న ఇరుగుపొరుగువారు తలుపులు పగులగొట్టి ఇంట్లోకి ప్రవేశించారు. అప్పటికే ఇద్దరు రక్తం మడుగులో పడి ఉన్నారు. రఫియా అక్కడికక్కడే మరణించింది. లక్ష్మణ్‌ను కామారెడ్డి ప్రభుత్వాస్పత్రికి తరలించారు. రఫియా తన ప్రేమను తృణీకరించిందనే కోపంతో లక్ష్మణ్ ఈ దాడికి పాల్పడినట్లు తెలుస్తోంది.

Published On October 30, 2011