ఏ పార్టీలోకి వెళ్లను, అందుకే టిడిపిని వీడా: నాగం

By Srinivas

Published: Monday, October 31, 2011, 16:07 [IST]

హైదరాబాద్: తాను ఏ పార్టీలోనూ చేరే ప్రసక్తి లేదని తెలంగాణ నగారా సమితి చైర్మన్, నాగర్ కర్నూలు శాసనసభ్యుడు నాగం జనార్ధన్ రెడ్డి సోమవారం స్పష్టం చేశారు. ఇటీవల తెలుగుదేశం, కాంగ్రెసు పార్టీల నుండి తెలంగాణ రాష్ట్ర సమితిలోకి భారీగా వలసలు జరుగుతున్న విషయం తెలిసిందే. దీనిపై విలేకరులు ప్రశ్నించడంతో తాను ఏదో ఒక పార్టీని బలోపేతం చేయడానికి తెలుగుదేశం పార్టీని వీడలేదన్నారు. వలసల వల్ల ప్రయోజనం లేదని కాబట్టి తాను ఏ పార్టీలోకి వెళ్లేది లేదన్నారు. 2009లో వచ్చిన తెలంగాణను అడ్డుకున్న టిడిపిని ప్రత్యేక రాష్ట్ర సాధన కోసమే వీడామన్నారు.

కాగా ఇటీవల పలువురు కాంగ్రెసు, టిడిపి శాసనసభ్యులు పార్టీలను వీడి టిఆర్ఎస్‌లో చేరుతున్నారు. కానీ తెలుగుదేశం పార్టీని ఎప్పుడో వీడిన నాగం, ఆయన బృందం మాత్రం ఏ పార్టీలో చేరకుండా తెలంగాణ కోసం పోరు కొనసాగిస్తోంది. అయితే ఏదో ఒక పార్టీ అండ ఉండాలనే ఉద్దేశ్యంతో ఇటీవలే నాగం బృందానికి చెందిన జోగు రామన్న టిఆర్ఎస్‌లో చేరారు.

Published On October 31, 2011